मकवानपुर १ मा एमालेको समर्थनमा चुनाव लडेका कमल थापा पराजित

८ मंसिर, काठमाडौं । राप्रपा नेपालका अध्यक्ष कमल थापाले मकवानपुर २ बाट प्रतिनिधिसभा सदस्यमा पराजय स्वीकार गरेका छन् । मत गणना अन्तिम चरणमा पुग्दै गर्दा उनले हार स्वीकार गर्दै नेकपा (एमाले) अध्यक्ष केपी शर्मा ओलीसँग आफू दुःखी भएको सन्देश प्रवाह गरेका छन् ।

उनले ओलीलाई मेन्सन गर्दै झापा ५ बाट प्रतिनिधिसभा सदस्यमा निर्वाचित भएका शुभकामना दिँदै आफू मकवानपुर १ मा पराजित भएको सन्देश दिएका हुन् । सामाजिक सञ्जालमा बिहीबार दिउँसो सामाजिक सञ्जालमार्फत अध्यक्ष थापाले ओलीलाई शुभकामना दिएका छन् । झापा ५ मा कांग्रेसका खगेन्द्र अधिकारीलाई पराजित गर्दै ओली निर्विाचित भएका छन् ।

अन्तिम मतपरिणाम अनुसार दीपकबहादुर सिंहले २७ हजार ८१६ मत प्राप्त गरेर विजयी भएका छन् । डिनाले २५ हजार ४३४ मत प्राप्त गरिन् भने कमल थापाले २५ हजार ४२० मत पाए । तेस्रो नम्बरमा रहेका सिंह हेटौंडा उपमहानगरपालिकाको मतगणना सुरु भएपछि उकालो लाग्न थालेका थिए । हेटौंडा ९ र १० नम्वर वडाको मत गन्न बाँकी रहँदा सिंह १८ मतले अघि बढे । अन्ततः२ हजार ३९६ मतान्तरमा विजयी भएरै छोडे ।

थापाले ओलीले आफूलाई विश्वास गरेको तर विश्वास जोगाउन आफू असफल भएको भन्दै दुःख मनाउ गरेका हुन् ।
मकवानपुर १ मा राजेन्द्र लिङदेन नेतृत्वकाे राप्रपाका दीपकबहादुर सिंहले बाजी मारेका छन् । सत्ता गठबन्धनकी उम्मेदवार कांग्रेसकी महालक्ष्मी उपाध्याय ‘डिना’ दाेस्राे स्थानमा सीमित भइन् । अध्यक्ष थापा तेस्रो स्थानमा झरे ।

‘मलाई विश्वास गर्नुभएकोमा केपी शर्मा ओलीलाई धन्यवाद । तर, तपाईंको विश्वास जोगाउन नसकेकोमा दुःखी छु। तपाईंलाई मेरो शुभकामना’ थापाले लेखेका छन् । उनले एमाले सूर्य चिन्ह लिएर चुनाव लडेका थिए ।

ओलीले उम्मेदवारको टिकट दिँदा निर्वाचन क्षेत्रमा एमालेका कार्यकर्ताले एमाले पार्टी कार्यालयमा तालाबन्दी गरेर विरोध जनाएका समेत थिए । तैपनि टसमस नभइकन ओलीले थापालाई अगाडि बढाए । ओलीले सोचेजस्तो एमालेको मत ‘ट्रान्स्फर’ नभएकै कारण मतगणनामा थापा अगाडि आउन नसकेका चर्चा छ ।