रामेछाप (क)मा माओवादी केन्द्रका तारानारायण श्रेष्ठ विजयी

९ मंसिर, रामेछाप । एउटै मात्र संघीय निर्वाचन क्षेत्र भएको रामेछाप जिल्लाको प्रदेशसभातर्फ (क)मा नेकपा (माओवादी केन्द्र(का तारानारायण श्रेष्ठ विजयी भएका छन् ।

विजयी श्रेष्ठले बाग्मती प्रदेशका पूर्वमन्त्री समेत रहेका नेकपा (एमाले) शान्तिप्रसाद पौडेललाई एक हजार १९१ मतान्तरले पराजित गरेका छन् । गएराति सम्पन्न मत गणनाअनुसार विजयी श्रेष्ठले १७ हजार १४८ र पराजित पौडेलले १५ हजार १५७ मत ल्याएका छन् ।

श्रेष्ठलाई सत्ता गठबन्धनका दल र पौडेललाई जसपा, राप्रपाको समर्थन थियो । श्रेष्ठ २०६४ को संविधानसभाका सभासद् समेत हुन् । (क)मा कांग्रेसको मत राम्रो मात्रामा ‘ट्रान्सफर’ भएको विश्लेषण् गरिएको छ ।

प्रदेश (ख) तर्फको मतगणना भने शुरु भएको छैन । (ख))मा गठबन्धनकै समर्थनमा माओवादी केन्द्रका गुन्सीका युवराज चौलागाँई उम्मेदवार छन् । गठबन्धनको भागबण्डामा दुवै प्रदेश माओवादी केन्द्र र प्रतिनिधिसभामा नेपाली कांग्रेसले लिएका थिए ।

प्रतिनिधिसभाका गठबधनबाट नेपाली कांग्रेसका पूर्णबहादुर तामाङ ‘कान्छाराम’ उम्मेदवार छन् । पछिल्लो मत गणना अनुसार एमालेका कैशाल ढुंगेलभन्दा करिब ४ हजारले अगाडि छन् । यद्यपि प्रदेश (ख)तर्फ कान्छारामको मताधार संख्या कमजोर रहेको चर्चा छ ।

(ख)मा पर्ने दोरम्बा शैलुङ, सुनपति र खाँडादेवी गाउँपालिकामा एमालेको मताधार बलियो पाइन्छ । खाँडादेवी एमालेको पकड क्षेत्र मानिन्छ । गएको वैशाखमा सम्पन्न स्थानीय तहको चुनावमा खाडाँदेवीमा अध्यक्ष र उपाध्यक्ष दुवै धेरै मतान्तरले एमालेले जितेको छ भने दोरम्बा शैलुङमा माओवादी केन्द्र र कांग्रेसबीचकाे चुनावी तालमेलमा अध्यक्षमा माओवादी केन्द्रका मैनकुमार मोक्तान ‘मदन’ले एमालेका उम्मेदवार टंकप्रसाद चौलागाँईभन्दा १२० मत बढीले मात्र जितेका छन् । उपाध्यक्षमा कांग्रेसकी खमला थापामगर जितेकी छन् । माओवादी केन्द्रकै मतले थापामगर विजयी भएकी हुन् । याे गाउँपालिका कांग्रेस निकै कमजाेर मानिन्छ ।

उता सुनपतिमा अध्यक्ष र उपाध्यक्ष माओवादी केन्द्रले जितेको थियो । यसरी जीत निकाल्दा एमालेसँग झिनो मतले जितेको हो ।

खाँडादेवी र दोरम्बा शैलङको तुलनामा सुनपतिमा एमालेको मताधार केही कमजोर देखिन्छ । तर माओवादी केन्द्रभित्रका पूर्व जनमोर्चा पंक्तिले कान्छारामको उम्मेदवारीप्रति असन्तुष्ट जनाउँदै प्रतिनिधिसभातर्फ रामकुमार लामालाई उम्मेदवार बनाएर चुनावी गएको अवस्था छ । यसमा कान्छारामलाई जानुपर्ने माओवादी केन्द्रभित्रका मत लामाले कटौती गर्ने र यसबाट कान्छारामलाई माओवादीबाट जानुपर्ने मत सबै नजाने आकलन गरिएको छ ।