अन्तरघात आरोपमा स्याङ्जा एमालेमा कुटपिट, कार्यालय तोडफोड

♦प्रकाश डोटेल

११ मंसिर, स्याङ्जा । नेकपा एमाले स्याङ्जामा अन्तरघात गरेको भन्दै कुटपिट भएको छ । प्रतिनिधिसभा क्षेत्र नं. १ मा कांग्रेस उम्मेदवार राजु थापासँग एमाले उम्मेदवार नारायणप्रसाद मरासिनी हारेपछि अन्तरघात भएको भन्दै एमालेभित्र कुटपिट भएको हो ।

कुटपिटबाट एमाले जिल्ला कमिटि सदस्य तथा पुतलीबजार नगरपालिका वडा नं. १३ का ईन्चार्ज लक्ष्मीपति सुवेदी घाईते भएका छन् । ४९ वर्षिय घाईते सुवेदीको टाउको र शरीरका विभिन्न भागमा चोट लागेको छ ।

घाईते सुवेदीको स्वास्थ्य अवस्था सामान्य रहेको अस्पताललाई उदृत गर्दै प्रहरीले जनाएको छ । सुवेदीको टाउकोमा २ वटा टाँका लगाईएको छ । स्थानीय मेडिकल र जिल्ला अस्पताल स्याङ्जामा सामान्य उपचारपछि सुवेदीको पोखरामा थप उपचार गरिएको हो ।

सुवेदीमाथि सांघातिक आक्रर्मण हुँदा उनकी १८ वर्षिय छोरी विनिता सुवेदी समेत घाईते भएकी छन् । उनको टाउको, खुट्टा र शरीरका विभिन्न भागमा चोट लागेको स्थानीयले बताए । आक्रमणमा परेका बुबालाई जोगाउन जाँदा छोरीलाई चोट लागेको हो ।

अन्तरघातको आरोपमा कुटिएका सुवेदीले मरासिनी समर्थित युवाहरु डोलबहादुर मल्ल, विष्णुबहादुर थापा र सुनिल गिरी बिरुद्ध जिल्ला प्रहरी कार्यालयमा उजुरी दर्ता गराएका छन् । उजुरीपछि कुटपिटमा संलग्नको खोजीकार्य भईरहेको स्याङ्जा प्रहरीले जनाएको छ ।

सुवेदीलाई कुटपिट गर्नु पूर्व युवाहरुले एमाले स्याङ्जाको पार्टी कार्यालय तोडफोड गरेका छन् । तोडफोडबाट कार्यालयका कुर्चि, टेबल र झ्यालका सिसाहरु फुटेको एमाले स्याङ्जाले जनाएको छ ।

एमाले स्याङ्जाभित्र नारायण मरासिनी र पद्मा अर्याल खेमाबीच अन्तरघातको आरोप प्रत्यारोप चलेको छ । मरासिनी पराजित भएसँगै अर्याल समर्थित क्षेत्र नं. १ का कार्यकर्ता त्रसित बनेका छन् । त्रसित केही स्थानीय नेताले सामाजिक सञ्जालमार्फत सुरक्षाको माग गरेका छन् ।

युवाहरुले फोनमार्फत आवश्यक परे भौतिक आक्रमण गर्ने भन्दै धम्क्याउने गरेको अर्याल समर्थित कार्यकर्ताले बताएका छन् । मरासिनीलाई अन्तरघात गर्नेहरुले चुनावको अघिल्लो रात लगेको पैसा समेत नबाँढेको आरोप लागेको छ ।