नेम्वाङ विजयी क्षेत्रकाे समानुपातिक मतपेटिकामा प्रत्यक्षको मतपत्र भेटियो

११ मंसिर, काठमाडौं । पाँचथरमा समानुपातिक तर्फको मतपेटिका प्रत्यक्षतर्फको मतपत्र भेटिएको छ । यस क्षेत्रमा नेकपा (एमाले)का उम्मेदवार बसन्तकुमार नेम्वाङ विजयी भइसकेका छन् । उनले नेपाली कांग्रेसका उम्मेदवार भीष्मराज आङ्देम्बेलाई हराएका हुन् ।

तर प्रतिनिधि सभाको समानुपातिकतर्फका मतपेटिकामा प्रत्यक्षतर्फका २१ मतपत्र भेटिएपछि यहाँ मतगणना केहीबेर रोकिएको थियो । मुख्य निर्वाचन अधिकृत टिकेन्द्र दाहालका अनुसार निर्वाचन आयोगको निर्देशनपछि अहिले मतगणना सूचारु छ ।

प्रत्यक्षतर्फको मत गणना सकेर विजयीको समेत टुंगो लागिसकेको अवस्थामा समानुपातिकतर्फका मतपेटिकामा प्रत्यक्षको मतपत्र भेटिएपछि यसलाई के गर्नेबारे आयोगले निर्णय लिन सकेको छैन । प्रत्यक्षतर्फ नेम्वाङले आङदेम्बेलाई सिर्फ १४ हराएका छन् । यसरी भेटिएको मतपत्र कुन उम्मेदवारको हो भन्ने बताइएको छैन । तर रुख र सूर्य दुवै तर्फका चिन्हमा स्वस्तिक छाप लगाइएको मतपत्र रहेको बताइन्छ । ३० हजार समानुपातिक मत गणना गर्दा २१ वटा प्रत्यक्षतर्फका मतपत्र फेला परेको जनाइएकाे छ ।

पाँचथरमा मंसिर ४ को चुनावमा ७४ हजार चार सय ९३ मत खसेको थियो । अहिलेसम्म प्रतिनिधि सभामा ३० हजार ९ सय ८८ मतगणना भएको छ ।