समानुपातिकतर्फ ८० प्रतिशत मतगणना सकियो, एमालेकाे अग्रता कायमै

११ मंसिर, काठमाडौं । प्रदेश तथा प्रतिनिधिसभा निर्वाचनअन्तर्गत समानुपातिकतर्फ देशभर ८० प्रतिशत मतगणना सकिएको छ । मंसिर ४ गते सम्पन्न निर्वाचनको हाल ८० प्रतिशत मतगणना सकिएको निर्वाचन आयोगले जनाएको छ ।

यद्यपि उक्त मतपरिणम आयोगको सूचना प्रणाली र समानुपातिक प्रणालीको तथ्यांक मुख्य निर्वाचन अधिकृतको कार्यालयमा अभिलेख हुने क्रम जारी रहेको आयोगले जनाएको छ ।

यसपटकको आमनिर्वाचनमा एक करोड ७९ लाख ८ हजार ८५० मध्ये झण्डै ६१ प्रतिशत मत खसेको थियो । कूल खसेको मतको ८० प्रतिशत मतगणना गरिसक्दा अब समानुपातिक प्रणालीतर्फ झण्डै २४ लाख मत गणना गर्न बाँकी रहेको आयोगले उल्लेख गरेको छ ।

अहिलेसम्मको मत गणनामा एमाले पहिलो, कांग्रेस दोस्रो र माओवादी केन्द्र तेस्रो, रास्वपा चौथो, र राप्रपा पाँचौं र जसपा छैटौंमा रहेका छन् । माधवकुमार नेपाल नेतृत्वको नेकपा (एकीकृत समाजवादी)ले भने ३ लाख मत कटाएको छैन । निर्वाचन यही मंसिर ४ मा सम्पन्न भएकाे थियाे ।