‘न्याय चाहियो’ भन्दै सर्वोच्चको गेटमा रातो रंग छ्यापेर विरोधमा उत्रिएका दुई जना पक्राउ

१३ मंसिर, काठमाडौं । सर्वोच्च अदालतको प्रवेश द्वारमा रातो रंग छ्यापेर प्रदर्शन गर्ने दुई जनालाई प्रहरीले पक्राउ गरेको छ । प्रदर्शनमा उत्रिएका उनीहरूले ‘न्याय चाहियाे’ भन्दै राताे रंग छ्यापेका छन् ।

‘न्याय चाहियो’ भन्दै द्वारमा रातो रंग घोलिएको बट्टा फ्याँकेर प्रदर्शनमा उत्रिएका सिरहा घर भएकी बिनु यादव र जस्मिन ओझालाई पक्राउ गरिएको जिल्ला प्रहरी परिसर काठमाडौंले जनाएको छ । ज्यास्मिन भने महिला अधिकारवादी भएको बुझिएको छ ।

बिनुले यसअघि रामेछाप जिल्ला अदालतको इजलासमा विष सेवन गरेर आत्महत्या प्रयास गरेको खुलेको छ । पतिविरुद्ध दायर गरेको उनको मुद्दा अहिले पाटन उच्च अदालतमा विचाराधीन छ । रंग छ्यापेर विरोध जनाउन कार्यालय शुरु हुने समयमा उनीहरु ट्याक्सी चढेर पुगेकी थिइन् । उनीहरूले लगाएकाे सेताे साडी रंगले भिजेकाे छ ।

महिलामाथि हुने हिंसासम्बन्धी अन्तर्राष्ट्रिय रूपमा १६ दिने अभियान चलाइराख्दा उनीहरुले मुलुककै सर्वोच्च न्यायालय परिसरमा गम्भीर प्रकृतिका विरोध भएको हो ।

सर्वोच्चको गेटमा जम्मा भएका प्रहरीहरुले जारको पानी खन्याएर रातो रंग पखालेका थिए । रंग द्वारसँगै राखिएकाे सर्वाेच्चकाे बाेर्डमा समेत लागेकाे थियाे । पक्राउ परेका दुवै जनालाइ सिंहदरबार प्रहरी वृत्तमा लगिएकाे छ ।