बाजुरा र स्याङ्जा २ मा मतगणना गर्न निर्वाचन आयोगको निर्देशन

१४ मंसिर, काठमाडौं । निर्वाचन आयोगले बाजुरा र स्याङ्जा क्षेत्र नम्बर २ मा मतगणना गर्न निर्देशन दिएको छ ।

आयोगको आज बसेको बैठकले दुई जिल्लामा पुनः मतदानको सट्टा मतगणना गर्ने निर्णय गरेपछि यस्तो निर्देशन दिइएको छ ।

यी दुई क्षेत्रमा मुख्य दलहरुबीच बुथ कब्जाको आरोपप्रत्यारोका कारण मतदान मंसिर ४ गते मतदान सम्पन्न भएपनि मतगणना शुरु हुन सकेको थिएन । नसकेपछि आयोगले केन्द्रबाट सहसचिवको नेतृत्वमा जाँचबुझ टोली पठाएर प्रतिवेदन समेत तयार पार्न कार्यादेश दिएको थियो । टोलीले बुझाएको प्रतिवेदनमाथि आज बैठकमा छलफलपछि मतगणना शुरु गर्ने निर्णय लिएको हो ।

मुख्य दलमध्ये स्याङजा २ मा नेकपा (एमाले)ले पुनः मतदान गर्नुपर्ने अडान राखेको थियो भने सत्ता गठबन्धनले भने मतगणना शुरु गर्नुपर्ने माग राख्दै आएको थियो । बाजुरामा पनि दलहरु यही अवस्थामा थिए । यस्तो अवस्थाबीच आयोगले मतगणना गर्ने पक्षमा निर्णय लिएको हो ।

स्याङजा २ मा सत्ता गठबन्धनमा आवद्ध दलहरुको समर्थनमा कांग्रेसका उपसभापति धनराज गुरुङ र एमालेबाट पार्टीकी सचिव पद्मा अर्याल उम्मेदवार छन् ।

यस्तै, बाजुरामा गठबन्धनका तर्फबाट नेपाली कांग्रेसका बद्री पाण्डे र एमालेबाट कर्णबहादुर थापा उम्मेदवार छन् । विवादित क्षेत्रमध्ये आयोगले दोलखामा भने विवादित मतदान केन्द्रमा भोलि शुक्रबार पुनः मतदान गर्दैछ ।