धनुषामा छिमेकी झगडामा १ जनाको हत्या, ४ घाइते

१६ मंसिर, जनकपुरधाम । धनुषाको मिथिला बिहारीमा दुई छिमेकीबीचको झगडामा एक जनाको ज्यान गएको छ । अन्य अन्य ४ जना घाइते भएका छन् । हत्या हुनेमा मिथिला बिहारी नगरपालिका–४ रमौल बस्ने ५३ वर्षीय प्रभु यादव रहेका छन् ।

बिहीबार राति साढे ८ बजेको समयमा स्थानीय सुरज यादव परिवारको समूहले घरेलु हतियारसहित घरमै आएर खुकुरी, बञ्चरोले आक्रमण गरेपछि घटनास्थलमै बुबा प्रमुको मृत्यु भएको उनका छोरा अशोक यादवले बताए ।

घटनामा प्रभुकी श्रीमती महाजनी देवी यादव, जेठो छोरा जगरनाथ यादव, माहिलो छोरा सन्तोष यादव र कान्छो आशोक यादव घाइते भएका छन् । सन्तोषको टाउकोमा गम्भीर चोट लागेको छ । टाउकोमा १८ वटा टाँका लगाइएको छ भने एउटा हातका दुईवटा औंला काटिएका छन् । अन्य सामान्य घाइते भएका छन् । उनीहरुको प्रादेशिक अस्पतालमा उपचार भइरहेको छ ।

अशोकका अनुसार राति ८ बजे घरमा खाना खाएर बुबा दैलोमा आगो तापिरहेका बेला सुरज यादवसहित १० जनाको समूहले बञ्चरो, खुकुरीसहित आक्रमण गरका थिए । बुबालाई टाउको बञ्चरोले हिर्काएर ढालेपछि आफूहरुमाथि जथाभावी आक्रमण गरेको उनको भनाइ छ । मृतकको शव पोस्टमार्टमको लागि प्रादेशिक अस्पताल जनकपुरमा पठाइएको छ ।

करिब दुई महिना अघि सुरजका बाख्राले प्रभुको बाली खाएको विषयलाई लिएर विवाद भएको पाइएको प्रहरीको दाबी छ ।