गाडी आयात खुलाउन अटो व्यवसायीद्वारा आन्दोलन घोषणा

१६ मंसिर, काठमाडौं । गाडी आयात खुलाउन माग गर्दै अटो व्यवसायीद्वारा आन्दोलन घोषणा गरिएको छ । व्यवसायीहरुले शतप्रतिशत नगद मार्जिन खारेज गर्नुपर्ने माग पनि अगाडि सारेका छ ।

राष्ट्र बैंकको नीतिका कारण व्यवसायीहरु चरम समस्यामा परेको जनाउँदै अटोमोबाइल्स व्यवसायीहरुले आज राजधानीमा एक पत्रकार सम्मेलन गरी विरोध कार्यक्रम समेत सार्वजनिक गरेका छन् ।

चालू पुँजी कर्जा मार्गदर्शन खारेज, मौद्रिक नीति परिमार्जन, ब्याजदर नियन्त्रण र गाडी आयात फुकुवा गर्नुपर्ने माग उनीहरुको छ । नाडा अटोमोबाइल्स एसोसिएसन अफ नेपालका अध्यक्ष ध्रुव थापाले आफूहरुको अगाडि बाध्यात्मक परिस्थिति आएको बताए । अटो क्षेत्रले राज्यलाई २१ प्रतिशत राजस्व योगदान गरिरहेको बताउँदै उनले सरकारले अटोमोबाइल्सलाई प्राथमिकतामा नराखेको गुनासो गरे ।

गाडीमा ५० र पार्टपूर्जामा १०० प्रतिशत नगद मार्जिन राख्नु अन्या भएको बताए । व्यवसाय चौपट भएकै कारण १ लाख रोजगारीमध्ये ३० प्रतिशत कटौती भएको उनको भनाइ थियो । व्यवसायीहरुले पत्रकार सम्मेलनमै प्लेकार्ड बोकेर विरोध शुरु गरेका छन् ।

उनीहरुले यही ुमंसिर २२ गतेका लागि एक हप्ते विरोधका कार्यक्रम सार्वजनिक गरेका छन् । जसअनुसार २२ गते बिहान ११ बजेदेखि २ बजेसम्म माइतीघर मण्डलामा धर्ना दिने नाडाका महासचिव सुरेन्द्र कुमार उप्रेतीले जानकारी दिए । हालसम्म देशभर व्यापार नभएका कारण ५८ वटा डिलर बन्द भएको कार्यक्रममा जानकारी दिइयो ।