प्रदेश राजधानी दाङ नसार्न एमालेको माग

१८ मंसिर, बुटवल । नेकपा (एमाले)को रुपन्देही जिल्ला कमिटीले लुम्बिनी प्रदेश राजधानी दाङमा तत्काल नसार्न प्रदेश सरकारसँग माग गरेको छ ।

हाल बुटवल रहेको राजधानी दाङको भालुवाङ सार्न लागिएकोप्रति आफ्नो ध्यानाकर्षण भएको जनाउँदै एमालेले बिनापूर्वाधार राजधानी तत्काल दाङ नसार्न माग गरेको हो ।

सस्तो लोकप्रिययताका लागि भालुवाङ राजधानी सार्न थालिएको आरोप लगाउँदै एमालेले तत्काल राजधानी सार्ने काम रोक्न आग्रह गरेको छ ।

एमाले रुपन्देही अध्यक्ष तेजेन्द्र केसीले आइतबार विज्ञप्ति जारी गरेर राजधानी सार्ने काम रोक्न माग गरेका हुन् । राजधानी भालुवाङ सार्ने तयारी स्वरुप सरकारले बुटवलबाट विभिन्न कार्यालयहरू सार्न थालेपछि एमालेले आपत्ति जनाएको हो ।

प्रदेशसभा नयाँ जनप्रतिनिधि निर्वाचित भइसकेको अवस्थामा अहिले राजधानी सार्ने काम उचित नभएको भन्दै एमालेले प्रदेशमा बन्ने नयाँ सरकारले यसबारे काम गर्नुपर्ने जिकिर गरेको छ ।

प्रदेशका कर्मचारीहरु समेत तत्काल दाङमा राजधानी सार्न नहुने भन्दै विरोधमा उत्रिएका छन् । उनीहरुले पूर्वाधार तयार नभएकै कारण दाङमा राजधानी सार्दा सेवा प्रवाह र काम गर्न कठिन हुने बताउँदै आएका छन् । यसअघि सारिएका कतिपय मन्त्रालय स्थानीय तहका वडाका कार्यालयहरुमा कार्यालय राखेर सेवा दिने प्रयार गरिरहेका छन् ।