सत्ता गठबन्धनको बैठक सोमबार बस्ने

१८ मंसिर, काठमाडौं । प्रधानमन्त्री एवं नेपाली कांग्रेसका सभापति शेरबहादुर देउवाले सोमबार सत्ता गठबन्धनको बैठक बोलाएका छन् । प्रतिनिधिसभातर्फ १६४ र प्रदेशसभातर्फ ३२८ सिटको परिणाम आइसकेको छ भने समानुपातिकतर्फ पनि मतगणना अन्तिम चरणमा छ ।

चुनावी परिणामको समीक्षा र भावी सरकार गठनका विषयमा छलफल गर्न सत्ता गठबन्धनको बैठक बोलाइएको हो । बैठक सोमबार दिउँसो ३ बजे बालुवाटारमा बस्ने भएको छ । बैठकमा चुनावको परिणामको समीक्षा र आगामी सरकार निर्माण लगायत विषयमा छलफल हुने नेकपा (माओवादी केन्द्र)का महासचिव देवप्रसाद गुरुङले जानकारी दिए ।

कांग्रेस नेतृत्वको गठबन्धनमा माओवादी केन्द्र, नेकपा (एकीकृत समाजवादी) र राष्ट्रिय जनमोर्चा छन् । चुनावकै मुखमा आइपुगेर जसपाका अध्यक्ष उपेन्द्र यादव गठबन्धनबाट हटेका थिए । उनले चुनावमा एमालेसँग तालमेल गरेका थिए । साेही कारण प्रम देउवाले यादवका मन्त्री सबैलाई बर्खास्त गरेका थिए ।

चुनावअघिसम्म एमालेकाे सहायात्री रहेकाे महन्थ ठाकुर नेतृत्वको लोकतान्त्रिक समाजवादी पार्टी (लोसपा) भने चुनावमा गठबन्धनसँग आंशिकरुपमा गठबन्धन गरेको थियो । लोसपा पनि सरकारमा जाने तयारीमा जुटेको छ ।