पत्रकारमाथि आक्रमण गर्ने बिरुद्ध प्रहरीमा ज्यान मार्ने कसुरमा मुद्दा दर्ता, विभिन्न संघसंस्थाद्धारा कारवाहीको माग

१९ मंसिर, हेटौडा । आइतबार राती समाचार लेखेकाे विषयलाई लिएर पत्रकार रामकुमार एलन र रमेश बञ्जरा (इन्द्र) माथि हातपात भएको छ । हातपातबाट उनीहरू सख्त घाइते भएका छन् ।  सञ्चारमाध्यम तथा विभिन्न सामाजिक सञ्जालमार्फत आफ्ना नेताविरुद्ध समाचार लेखेको भन्दै आइतबार राति ९ः५० तिर हेटौँडा उपमहानगरपालिका–२ स्थित पल्पसा सदनमा एलनमाथि सांघातिक हमला भएको हो ।

आफूलाई कांग्रेसका नेता इन्द्र बानियाँको समर्थक दाबी गर्ने राजेश भेटवालसहितका करिब २०–२२ जनाको जत्थाले आक्रमण गरेको प्रत्यक्षदर्शीले बताएका छन् । निर्वाचनका समयमा नेतालाई असर पर्ने गरी समाचार लेखेको विषयमा सामान्य विवाद भएकै अवस्थामा उनीहरूमाथि सो समूहले आक्रमण गरेको हो ।

पत्रकार एलनको उद्धार गर्न पुगेका नेपाल पत्रकार महासंघ, बागमती प्रदेश समितिका महासचिव कृष्ण सारु मगरमाथि पनि उक्त समूहले आक्रमण गरेको बताइएको छ । महासचिव मगर पनि सामान्य घाइते भएका छन् । पत्रकार एलनको देब्रे कान र दाहिने गालामा चोट लागेको छ । घाइते दुई पत्रकारले भेटवाल, राजु नगरकोटी, रञ्जन बनियाँसहितको नाम उल्लेख गरी ज्यान मार्ने उद्योगमा मकवानपुर प्रहरीमा किटानी जाहेरी दर्ता गरेका छन् ।

एलनमाथि भएको आक्रमणको विभिन्न सञ्चार संस्थाहरुले निन्दा गरेका छन् । नेकपा समाजवादी निकट पत्रकारहरूको संस्था समाजवादी प्रेस संगठनले एलनसहितका पत्रकाकारहरूलाई कुटपिट गर्ने र योजनाकारको पहिचान गरी कारवाही गर्न माग गरेको छ । संगठनका उपमहासचिवसमेत रहेका एलनलाई राजेश भेटवालसहितको २०र२२ जनाको जत्थाले कुटपिट गरेको र पत्रकार महासंघ वागमतीका महासचिव कृष्ण सारु मगरमाथि पनि कुटपिट गरिएको भन्दै समाजवादी प्रेस संगठनले घटनाको विरोध गरेको हो ।

महासचिव मगर सामान्य घाइते भएको तथा एलनको देब्रे कान र दाहिने गालामा गम्भीर चोट लागेको संगठनका महासचिव भूपराज खड्काले बताए । वागमती एक्सप्रेसमा हालै सम्पन्न चुनावमा कांग्रेसभित्रको घात(अन्तर्घातको समाचार प्रकाशित भएको थियो । मकवानपुर कांग्रेसले आइतबार पत्रकार सम्मेलन गरी समाचार झूट रहेको र त्यस्तो समाचार प्रकाशन नगर्न चेतावनी दिएको थियो ।