सर्वोच्चद्वारा भुवन केसीको नियुक्ति विरूद्धको रिटमा अन्तरिम आदेश दिन अस्वीकार

१९ मंसिर, काठमाडौं । चलचित्र विकास बोर्डका अध्यक्ष अभिनेता भुवन केसीको नियुक्तिविरूद्ध परेको रिटमा सर्वोच्च अदालतले अन्तरिम आदेश दिन अस्वीकार गरेको छ ।

बोर्डको अध्यक्ष हुन केसीको शैक्षिक योग्यता नपुग्ने भन्दै नरेशकुमार पौडेल लगायतले प्रधानमन्त्रीको कार्यालयलगायत विपक्षी बनाइ दायर गरिएको रिटमा न्यायाधीश आनन्दमोहन भट्टराई र प्रकाश सिहं राउतको संयुक्त इजलासले सोमबार अन्तरिम आदेश नदिई पूर्ण सुनुवाइका लागि पेश गर्ने आदेश दिएको छ ।

साउन ९ गतेको मन्त्रिपरिषदले केसीलाई चलचित्र विकास बोर्डको अध्यक्षमा नियुक्त गरेको थियो । शैक्षिक योग्यता साथै यौन दुर्व्यवहारको आरोप लागेका केसीलाई विकास बोर्डको अध्यक्ष बनाएर कानून मिचेको आरोप रिटमा थियो ।

दुई वर्षअघि अभिनेत्री साम्राज्ञी राज्यलक्ष्मी शाहले आफूमाथि केसीले यौन दुर्व्यवहार गरेको आरोप लगाउँदै १० करोड क्षतिपूर्ति माग दाबीसहित जिल्ला अदालतमा मुद्दा दर्ता गरेकी थिइन् ।