बिहेभोज खाएपछि बिरामी हुनेको संख्या १५० पुग्यो

२० मंसिर, काठमाडौं । पाल्पाको चिर्तुङधारामा बिहेभोज खाएर बिरामी पर्नेहरुको संख्या १५० पुगेको छ । बिरामीको संख्या बढ्दै गएपछि बगनासकाली गाउँपालिकाले घरघरमा स्वास्थ्यकर्मी खटाएको छ । उनीहरुले यही मंसिर १७ गते गाउँपालिकाका–१ मा बिहेभोज खाएका थिए ।

बिरामीहरुमा ज्वरो आउने, पखाला लाग्ने, टाउको दुख्ने, वाकवाकी लाग्ने, वान्ता हुने सुख्दापन आउने लगायतका समस्या देखिएको छ ।

बिरामीलाई स्लाइन पानी चढाउने, औषधि वितरण, जीवन जललगायत स्वास्थ्य शिक्षा दिइएको छ । पानीमा समस्या हो कि भन्ने स्थानीयको आशंका भएकाले स्वास्थ्य कार्यालयले पानीको जाँचका लागि समेत टोली खटाएको छ । बिहेमा झन्डै ४ सय निम्तालु आएको र त्यसमध्ये ९० प्रतिशत बिरामी भएको स्थानीयले बताएका छन् ।

केही बिरामीहरुको सदरमुकाम तानसेनस्थित निजी मेडिकल, मिसन अस्पताल र लुम्बिनी मेडिकल कलेजमा उपचार गराइरहेका छन् । अधिकांश गाउँमै भएकाले स्वास्थ्यकर्मी खटाएर उपचार सुरु गरिएको छ । बुढाखान्डे, भाङजेली, अम्रेली, पिपरटुङ, ढाडटोललगायत घोरबन्दा गाउँमा बढी समस्या देखिएको छ । घोरबन्दा क्षेत्रका झन्डै सय बढी घरपरिवारका १ सय ५० बढी तीन दिनयता बिरामी छन् ।

बिरामीहरुलाई प्राथमिक उपचार, स्लाइन पानी चढाउने, जीवन जलका साथै आवश्यक औषधि वितरण गरिएको छ । वितरित औषधिले काम नगरेको स्वास्थ्यकर्मीले बताएका छन् ।