किसानले लगाएको ताला खोल्ने क्रममा सिम्रौनगढमा झडप

२० मंसिर, बारा । जिल्लाको सिम्रौनगढ नगरपालिका–४ मा रासायनिक मलको विषयमा विवाद हुँदा दुई पक्षबीच झडप भएको छ । वडा कार्यालयमा लगाइएको तालाबन्दी खोल्ने विषयमा भएको विवादमा झडप भएको हो ।

वडा कार्यालयले पाएको रासायनिक मल वितरण गर्न मंसिर १५ गतेदेखि १८ गते आइतबारसम्म किसानसँग आवेदन माग गरेपनि निवेदन दिन जाँदा कार्यालय समयमा कार्यालय बन्द रहेको पाइएपछि विवाद चलेको थियो ।

आवेदन दिन नपाउँदा मल लिन वञ्चित हुनुपर्ने भन्दै कार्यालयमा तालाबन्दी गरेका थिए । तालाबन्दी अझै खुल्न सकेको छैन । किसानले लगाएको ताला कार्यालयले जबर्जस्ती खोल्न खोजेपछि झडप भएको बताइन्छ । आवेदन बुझे मात्र ताला खाेल्न दिन अडान किसानहरूले राखेका छन् ।

सरकारले मलकाे अभाव नरहेकाे जनाएपनि किसानले मल अभावकाे मार निरन्तर खेप्न विवश छन् ।