टिकापुर घटनालाई राजनीतिक मान्नेहरुसँग सहकार्य हुन्छ : रेशम चौधरी

२०० मंसिर, काठमाडौं । डिल्ली बजारको जेल सजायँ काटिरहेका नागरिक उन्मुक्ति पार्टीका संरक्षक रेशम चौधरीले टिकापुर घटनालाई राजनीतिक घटना मान्ने र घटनामा अभियुक्त बनाइएकालाई रिहाइकाे पक्षमा काम गर्ने दलहरुसँग पार्टीले सहकार्य गर्ने बताएका छन् ।

सरकारी स्वामित्वको एक संचारमाध्यमसँग अन्तवार्ता दिँदै संरक्षक चौधरीले कैलालीको टिकापुरमा भएको घटना राजनीतिक भएको र घटनासँग जोडेर लगाइएका सम्पूर्ण मुद्दा खारेज गरी थुनामा रहेका सबैलाई रिहा गर्नुपर्ने बताए ।

हालको संधिवान जारी हुनुपहिले २०७२ भदौ ७ मा कैलाली लगायत जिल्लाका थारु समूदायकेका बाहुल्यता रहेको क्षेत्रका मानिसहरुले थरुहट स्वायत्तताको माग गर्दै चलाइएको आन्दोलनका क्रममा भएको झडपमा प्रहरीका एसपी लक्ष्मण न्यौपानेसहित ७ सुरक्षाकर्मी र एक बालकको ज्यान गएको थियो ।

सोही घटनामा चौधरीलाई मुख्य योजनाकार रहेको दलिलसहित प्रहरीले चौधरीलगायत दर्जनौं मानिसहरुलाई पक्राउ मुद्दा चलाइएकोमा अदालतबाट दोषी ठहरिई चौधरीसहित थुप्रै व्यक्तिहरु जेलमा छन् । चौधरीलाई सर्वस्वसहित जन्म कैदको सजाय तोकिएको छ । अहिले पनि थुप्रै मानिसहरु तारेखमा छन् ।

चौधरी जेलभित्रै रहेर कैलाली, बाँके र बर्दियालाई केन्द्र बनाई राजनीतिक योजना बनाउँदै राजनीतिक दल खोले । उनी संरक्षक रहेको नागरिक उन्मुक्ति पार्टीले गएको वेशाखमा सम्पन्न स्थानीय तहको चुनावमा भाग लिएर स्थानीय तहको नेतृत्व्मा पुगेका छन् । योपटक प्रतिनिधिसभा र प्रदेशसभाको निर्वाचनमा भाग लिएर यो पार्टीले ३ सिट प्रतिनिधिसभा र ४ सिट प्रदेशसभा हात परिसकेको छ । समानुपातिकतर्फ पनि उसले उल्लेख्य मात ल्याइ राष्ट्रिय पार्टी बनेको छ । पार्टीका अध्यक्षमा उनकै श्रमिती रञ्जिता चौधरी श्रेष्ठ छिन् ।

जेलभित्रको बास रहेपनि पार्टी संचालन र खटनपटन उनकै तजबिजी चल्छ । रेशमपत्नी एवं नवनिर्वाचित संघीय सांसद रञ्जिताले हालै मात्र नागरिक उन्मुक्ति पार्टीले आगामी दिनमा लिने कार्यक्रमबारे चौधरीसँग सोधेर मात्र तय हुने बताइसकेकी छन् ।

यस्तो अवस्थामा संरक्षक चौधरीले पुनः टिकापुर घटनाको विषयलाई तताएका छन् । निर्वाचनबाट स्थान कायम गरेका मुख्य दलहरु गठबन्धन गरेर नयाँ सरकार गठनको तयारीमा जुटिरहेका बेला जेलमै अन्तर्वार्ता गरेर चौधरीलाई थप चर्चामा ल्याइदिएका छन् ।

नागरिक उन्मुक्ति पार्टीलाई टिकापुर घटनाले दुखाएका र घटना पीडितहरुले माया गरेको र पार्टीले घटनाका पीडितहरुको न्यायका लागि आवाज बुलन्द गर्ने दाबी समेत उनले बताएका छन् । संघीय सरकार गठनमा नागरिक उन्मुक्तिको निर्णयक बल नरहने देखिए पनि सुदूरपश्चिम र लुम्बिनी प्रदेश सरकार गठनमा भने निर्णायक शक्तिको रुपमा हेरिएको छ ।