तीनकुनेमा बसको ठक्करबाट मोटरसाइकल चालकको मृत्यु

२० मंसिर, काठमाडौं । काठमाडौंको तिनकुनेमा बसको ठक्करबाट मोटरसाइकल चालकको मृत्यु भएको छ । मंगलबार बिहान कोटेश्‍वरबाट सिनामगंलतर्फ आउँदै गरेको बाग्मती प्रदेश ०१९००६ ख ४८ ४० नम्बरको बसले बानेश्‍वरबाट कोटेश्‍वरतर्फ जाँदै गरेको बा ८१ प २७ ९९ नम्बरको मोटरसाइकललाई मंगलबार ठक्कर दिएको थियो । मोटरसाइकललाई ठक्कर दिँदा मोटरसाइकल चालक २५ वर्षीय रोमित रिजालको मृत्यु भएको हो ।

ठक्करबाट गम्भीर घाइते उनको उपचारका क्रममा सिचिल अस्पतालमा मृत्यु भएको हो । रिजाल झापा घर भई हाल भक्तपुरको चारदोबाटो बस्दै आएको खुलेको प्रहरीले जनाएको छ ।

मोटरसाइकलको पछाडि सवार सप्तरीको अग्नि सायर गाउँपालिका घर भई हाल भक्तपुरको दुवाकोट बस्ने २२ वर्षीय उदित चौधरी घाइते भएका छन् । उनको सोही अस्पतालमै उपचार भइरहेको छ । दुवै सवारी साधनसहित बस चालक नियन्त्रणमा लिएर थप अनुसन्धान गरिररहेको प्रहरी वृत्त बानेश्वरले जनाएको छ ।