चोलेन्द्रमाथिको महाभियोग निष्प्रभावी नभएकाे सरकारको प्रष्टाेक्ति

२१ मंसिर, काठमाडौं । संघीय संसद सचिवालयले निलम्वित प्रधानन्यायाधीश चोलेन्द्र शमशेर जबराविरुद्धको महाभियोग निष्क्रिय भएको भनी लेखेको पत्रबारे सरकारले मुख खोलेको छ ।

सरकारले सरकारका प्रवक्ता ज्ञानेन्द्रबहादुर कार्कीले निलम्बित प्रधानन्यायाधीश चोलेन्द्रशमशेर राणामाथि लगाइएको महाभियोग निष्प्रभावी नहुने र जीवितै रहेको प्रष्ट पारेका छन् ।

बुधबार मन्त्रिपरिषदका निर्णय सार्वजनिक गर्ने कार्यक्रममा संचारकर्मीको प्रश्नको जवाफ दिँदै प्रवक्ता कार्कीले राणामाथि लगाइएको महाभियोग कायमै रहेको बताए ।

‘महाभियोग कायमै छ। अब बस्ने प्रतिनिधि सभा बैठकमा यसबारे छलफल हुन्छ,’ उनले भने, ‘महाभियोग संसदको सम्पत्ति हो । नयाँ संसदमा यसबारे छलफल गरेर निर्णयमा पुग्छौं ।’

सचिवालयको पत्र प्राप्तपछि चोलेन्द्रश भने सर्वोच्च आउने तयारीमा छन् । उनी आउने बताएपछि नेपाल बार एसोसिएसनको नेतृत्वमा कानून व्यवसायीहरुले सर्वोच्चको मुख्य प्रवेश द्वारमा विरोधका व्यानरसहित धर्ना सुरु गरेका छन् ।