चाेलेन्द्रलाई लेखेकाे पत्र गैरकानूनीः महासचिव गुरुङ

२१ मंसिर, काठमाडौं । सत्तारुढ नेकपा (माओवादी केन्द्र)का महासचिव देव गुरुङले निलम्बित प्रधानन्यायाधीश चोलेन्द्रशमशेर जबरालाई नियमित काममा फर्किन पाउने गरी संसद सचिवालयका महासचिव चरतराज गौतमले लेखेको पत्र गैरकानूनी रहेको बताएका छन ।

जबरा संसदको महाअभियोगपछि निलम्वन अवस्थामै रहेको र आउने संसदले मात्र त्यसलाई टुंग्याउन सक्ने उनले बताए ।

गुरुङ जबरालाई महाअभियोग लगाउनेमध्ये ल्याउन सक्रियमध्येका तत्कालीन संसदका एक सदस्य हुन् । उनी यसपटको प्रतिनिधिसभा निर्वाचनमा भने लमजुङबाट पराजित भएका छन् ।

अहिले लमजुङमा रहेका महासचिव गुरुङले जबरालाई काममा फर्कन दिने गरी संसद सचिवालयबाट पत्र पठाएको भन्ने कुरा संचारमाध्यमबाट सुनेको बताउँदै उक्त पत्र गैरकानुनी र अवैधानिक रहेको बताए ।

महाअभियोगको विषय संसदले मात्र निर्णय गर्न सक्ने उनको भनाइ छ । संसदमा उत्पत्ति भएको महाअभियोग एउटा संसदले नटुंग्याउँदा अर्को संसदमा जाने उनले बताए । यही मंसिर ४ मा आम निर्वाचन सम्पन्न भई संसदमा नयाँ सदस्यहरुले आइसकेका छन् ।

निर्वाचन परिणामको अन्तिम फाइल राष्ट्रपतिबाट प्रमाणिकरण गर्न मात्र बाँकी छ । राज्यका निकायले संविधानको पालना नगर्दा सबैतिर गलत सन्देश जाने र अराजकता बढ्ने उनको भनाइ छ ।