‘चोलेन्द्रलाई नेताले क्लिन चिट दिए, तपाइँहरु कतिञ्जेल ढोका रुंगेर बस्नुहुन्छ ?’

२१ मंसिर, काठमाडौं । निलम्बित प्रधानन्यायाधीश चोलेन्द्र शमशेर जबराविरुद्धको महाभियोगको प्रस्ताव निष्प्रभावी भएको संघीय संसद सचिवालयले जबरासहितलाई पत्र दिएपछि अहिले कानून व्यवयासीहरु नेपाल बार एसोसिएसनको नेतृत्वमा सर्वोच्च अदालतको गेटमा कानुन व्यवसायी धर्नामा बसेका छन् ।

जबरा्रलाई सर्वोच्च प्रवे गर्नबाट रोक्न बुधबार दिउँसोबाट धर्ना शुरु भएको हो । महाभियोग फुकुवाको पत्र अवैधानिक भएको भन्दै संसदले महाअभियोग टुंगो नलगाएसम्म जबराले सर्वोच्च फर्किन नमिल्ने उनीहरुको तर्क छ ।

यस्तो अवस्थाबीच केही कानून व्यवसायीहरु भने धर्नाको विपक्षमा उभिएका छन् । पूर्वमहान्यायाधीवक्ता समेत रहेका वरिष्ठ अधिवक्ता डा. युवराज संग्रौलाले धर्ना बसेकाहरुलाई प्रश्न गरेका छन् । उनले नेताले नै जबरालाई क्लिन चिट अर्थात सफाइ दिएको भन्दै सर्वोच्चको ढोका रुंग्नु व्यर्थ भएको तर्क सामाजिक सञ्जालमार्फत गरेका छन् ।

धर्नामा बसेका कानुन व्यवसायीलाई संग्रौलाले अदालतलाई पपेट बनाउने नेता र तिनको चाकरी गर्ने तपाईं कति ठिक ? भन्दै प्रश्न गरेका छन् ।

‘विद्वान भनिने वकिलले जोकर हुनु कति ठिक ? चोलेन्द्र ठिक छ्न भन्दिनँ, तर अदालतलाई पपेट बनाउने नेता र तिनको चाकरी गर्ने तपाइँ कति ठिक ?,’ कानुन व्यवसायीलाई सम्बोधन गर्दै आफ्नो फेसबुक पेजमा लेखेका छन् । महाअभियोगबारे आफ्नै नेताहरुलाई सोध्न समेत भनेका छन् ।

‘प्रधानन्यायाधीशलाई स्वार्थअनुसार माया गर्ने र लखेट्ने नेता र उनका झोला बोक्ने वकिलकै कारण अदालत ध्वस्त भएको भन्दै त्यसविरुद्ध जनता जाग्ने बेला भएको तर्क उनको छ ।