बिहे भोज खाएपछि बिरामी परेका अधिकांशमा आउँको किटाणु पु्ष्टि

२२ मंसिर, काठाडौं । पाल्पाको चिर्तुङधारामा बिहे भोज खाएर बिरामी परेका अधिकांशमा आउँ रोगका किटाणु फेला परेको छ । तानसेनको मिसन अस्पतालमा उपचार गर्न गएका बिरामीहरूको दिसा जाँच गराउँदा रिपोर्टमा आउँका किटाणु देखिएको स्वास्थ्यकर्मीले बताएका छन् ।

लुम्बिनी प्रादेशिक अस्पताल र पाल्पाको बगनासकाली गाउँपालिकाका चिकित्सकले बुधबार अधिकांशको रिपोर्टमा आउँको किटाणु देखिएको बताएका हुन् । बिहेभोज खाएपछि बिरामी परेका पाल्पा चिर्तुङधारा घोरबन्दाका बिरामीको बुधबार पनि घरघरमा पुगेर उपचार गरिएको छ । उपचारका क्रममा अस्पतालमा गरिएको ल्याब परीक्षणमा यस्तो देखिएको बगनासकाली गाउँपालिका स्वास्थ्य शाखा प्रमुख मणिराम अधिकारीले बताए ।

मंगलबार मिसन अस्पताल र बगनासकाली गाउँपालिकाका ११ जना स्वास्थ्यकर्मी, स्वयंसेविका लगायतले सेवा दिएका थिए । बिरामीमध्ये कतिपयलाई सुधार आएपनि केहीमा पुनः समस्या देखिएको छ । बिरामीको दिसा जाँच गर्दा आउँको किटाणु फेला परेको लुम्बिनी प्रादेशिक अस्पतालका डा. विवेश। खनालले जानकारी दिए ।

सामान्य अवस्थाका बाहेक अधिकांशमा पेट दुख्ने, पखाला नरोकिने, टाउको दुख्ने, वाकवाकी लाग्ने समस्या कायमै भएकाले बुधबार बिहानदेखि थप स्वास्थ्यकर्मी र थप औषधिस पठाइएको उनले बताए ।

बगनासकाली गाउँपालिकाका–१, चिर्तुङधाराको घोरबन्दा क्षेत्रका झन्डै सय घरपरिवारका १ सय ५० जना तीन दिनयता बिरामी परेका छन् । निम्तो मान्न आएका छिमेकी गाउँ र प्यूठानबाट आएका ४५ जना जन्ती पनि बिरामी परेका थिए ।
जिल्ला स्वास्थ्य जनस्वास्थ्य कार्यालयले बिरामीहरुले कुन खानेकुरा खाएर बिरामी भएको हो भन्ने पत्ता लगाउन पानी जाँचका लागि नमुना संकलन गरेको जनाएको छ ।