नागरिकतासम्बन्धी प्रश्नमा लामिछानेले भने– ‘निर्वाचन आयोगले विजयी घोषणा गरिसक्यो, प्रमाणपत्र दिइसक्यो’

२२, मंसिर, चितवन । राष्ट्रिय स्वतन्त्र पार्टी (रास्वपा)का सभापति रवि लामिछानेले आफ्नो नागरिकतामाथि भइरहेको छानबिनमा राज्यलाई सघाउने बताएका छन् ।भरतपुर विमानस्थलमा पत्रकारसँग कुराकानी गर्दै सभापति लामिछानेले ‘अनुसन्धानमा बोलाउँदा जाने हो, जानकारी गराउने हो,’ उनले भने, ‘निर्वाचन आयोगले विजयी घोषणा गरिसक्यो, प्रमाणपत्र दिइसक्यो ।’

अर्को संगमा पार्टीभित्र चलेको समानुपातिक सांसद चयनमाथिकोा विवादलाई पार्टी प्रणाली र विधिबाट सुल्झाउने बताए । उनले विवाद गज्जब भएको बताए ।

पार्टीले गरेको प्राइमरीमा बढी मत आएकाहरुलाई छाडेर कम मत आएकाहरुलाई समानुपातिक सांसदमा बनाउन लागेको भन्दै बन्दसूचीमा रहेकाहरुले रास्वपा कार्यालयमा पुगेर विरोध गरेका छन् ।

लामिछानेले पार्टीभित्र कोही पनि तलमाथि नभएको भन्दै भने, ‘मैले नै खबरदारी गर्नुहोला भनेको छु, कोही आत्तिनुपर्ने अवस्था छैन ।’ सरकारमा जाने विषयमा पार्टीले परिस्थितिको आकलन गरिरहेको बताए ।