‘निजी क्षेत्र निराश छन्, अर्थतन्त्र संकटमा छ’ भनेर अभिव्यक्ति नदिनुस् : अर्थमन्त्री

२२ मंसिर, काठमाडौं । अर्थमन्त्री जनार्दन शर्माले उद्योगी, व्यवसायीहरु सडक आन्दोलनमा लाग्नुपर्ने अवस्था नरहेको बताएका छन् । काठमाडौंमा बिहीबार ‘फिन इलेक्ट्रो टेक-२०२२’ प्रदर्शनी कार्यक्रममा बोल्दै अर्थमन्त्री शर्माले उद्योगीरव्यवसायीहरुका समस्या समाधान गर्न सरकार गम्भीर रहेको भन्दै उद्योगीरव्यवसायीहरु सडक आन्दोलनमा नभइ उद्योग, व्यवसायमा लागेर उत्पादन बढाउनुपर्ने बताए ।

उनले ‘निजी क्षेत्र निराश छन्, अर्थतन्त्र संकटमा छ’ जस्ता अभिव्यक्ति नदिन व्यवसायीहरुसँग आग्रह गरे । सरकारले तरलता तथा बैंक ब्याजदर वृद्धि लगायतले उद्योग व्यवसायीहरुका समस्या समाधानका लागि निजी क्षेत्र, राष्ट्र बैंक, वाणिज्य मन्त्रालय र अर्थ मन्त्रालयका प्रतिनिधि सहितको कार्यदल दिएको सुझावका आधारमा काम भइरहेको मन्त्री शर्माले बताए ।

मन्त्री शर्माले उद्योगी व्यवसायीहरुले सडक रोज्नु गलत भएको बताउँदै सरकार व्यवसायीहरुका समस्या समाधान गर्ने नीति निर्माण गर्न निजी क्षेत्रसँग सहकार्य गर्न तयार रहेको आश्वसन दिए ।

उनले सरकार निजी क्षेत्र मिलेर अर्थतन्त्रमा देखिएका समस्या समाधान गर्दै बलियो अर्थतन्त्र बनाउन आवश्यक रहेकोमा जोड दिए । उनले सडकमा आन्दोलन गर्ने व्यवसायीहरुको काम नभएको बताउँदै बैंकको ब्याजदर, चालु पुँजी कर्जा निर्देशिकाको सन्दर्भमा सरकारले गम्भिरतापूर्वक छलफल गरिरहेको बताए ।

अर्को प्रसंगमा मन्त्री शर्माले अब विद्युत्‌लाई हाइड्रोजन बनाएर तेल आयात गर्ने देशलाई इन्धन निर्यात गर्ने देशमा पुर्‍याउने सरकारको लक्ष्य हुनुपर्नेमा जोड दिए ।

सरकार र राष्ट्र बैंकको गलत नीतिका कारण आफूहरु व्यवसायमा ठूलो क्षति व्यहोरेर कामबाट हात धुनुपर्ने अवस्थामा पुगेको भन्दै उद्योगी, अटो व्यवसायीहरु सडक आन्दोलनमा आएका छन् ।