बीवाइडीका कार किन्नेलाई नबिल बैंकसँग साझेदारी

२२ मंसिर, काठमाडौं । विद्युतीय कार किन्न चाहने ग्राहकलाई बीवाइडी अटो इन्डष्ट्रिजको आधिकारिक वितरक साइमेक्स इंकले बैंकिङ सहजता प्रदान गर्ने भएको छ । ग्राहकलाई सुविधा प्रदान गर्ने उद्देश्यले साइमेक्स इंकले नबिल बैंकसँग एक सम्झौता गरेको छ ।

सम्झौंता अनुसार अब बीवाइडीको कुनैपनि गाडी किन्न चाहने ग्राहकले नविल बैंकबाट कर्जा सुविधा पाउनेछन् । बुधबार भएको उक्त सम्झौंता अनुसार बीवाइडीले विक्री गर्ने विद्युतीय गाडीमा नबिल बैंकले कर्जा प्रबाह गर्नेछ ।

नेपाल राष्ट्र बैंकले नै विद्युतीय कारमा ८० प्रतिशतसम्म कर्जा दिन सकिने व्यवस्था गरेको कारण नविल बैंकले पनि त्यहिअनुसार ८० प्रतिशतसम्म कर्जा दिने जनाएको छ । अहिले बीवाइडीका गाडी किन्ने ग्राहकले नबिल बैंकबाट १२.९९ प्रतिशत ब्याजदरमा ७ वर्षसम्मको लागि फाइनान्स सुविधा पाउनेछन् । बीवाइडीको कुनैपनि मोडल किन्ने ग्राहकले मूल्यको २० प्रतिशत मात्र डाउन पेमेन्ट गर्दा पुग्छ ।

साइमेक्स इंकले बीवाईडीको एसयूभी एटो ३ र अल न्यू इ–६ ईभी नेपालमा बिक्री गर्दै आएको छ । अल न्यू इ–६ नेपालमा उपलब्ध इलेक्ट्रिक भेहिकल मध्ये सबैभन्दा धेरै रेन्ज दिने ईभी हो । अघिल्लो महिनाबाट नेपालमा बिक्री सुरु गरेको नयाँ मोडल एटो–३ को मूल्य ८९ लाख ९० हजार र अल न्यू इ–६ को मूल्य ५९ लाख तोकेर विक्री गर्दै आएको छ ।