कांग्रेसले देउवालाई दियो समानुपातिक सांसद छान्ने अधिकार

२४ मंसिर, काठमाडौं । नेपाली कांग्रेसको पदाधिकारी र कार्यसम्पादन समितिले प्रतिनिधिसभातर्फ समानुपातिक सांसदमा सिफारिस गर्ने नामको टुंगो लगाउने जिम्मा पार्टी सभापति शेरबहादुर देउवालाई दिएको छ । पार्टी प्रवक्ता प्रकाशशरण महतका अनुसार सूचीको अन्तिम टुंगो सभापति देउवाले लगाउने गरी जिम्मा दिइएको हो ।

उनले अन्तिम टुंगो लगाउन धेरै तलमाथि गर्ने ठाउँ नभएकाले पहिले दिएको प्राथमिकताको आधारमा गर्ने भनिएको र छलफलमा आएको मतको आधारमा सभापतिले पदाधिकारी र समितिका सदस्यसँग सल्लाह गरेर त्यसको आधारमा अन्तिम सूची पठाउने बताए । निर्वाचन आयोगले दलहरूलाई आजसम्म प्रतिनिधिसभा र प्रदेशसभाको समानुपातिकतर्फका सांसदको सूची क्लस्टर मिलाएर पठाउन निर्देशन दिएको छ ।

समानुपातिकमा पठाउने नाम टुंगो लगाउन कांग्रेसको पदाधिकारी र कार्यसम्पादन समितिको बैठक आज बसेको थियो । आफ्नो पार्टीबाट नाम चयन गर्दै सिफारिस गर्न अन्य राजनीतिक दलको बैठक पनि अहिले बसिरहेका छन् ।

यसैबीच, प्रदेशसभातर्फ प्रदेश–१, मधेस प्रदेश, वाग्मती प्रदेश र लुम्बिनी प्रदेशको सामनुपातिक सांसदमा कसलाई पठाउने भन्ने विषय पनि मिल्न बाँकी रहेको छ । बाँकी प्रदेशको भने पदाधिकारी बैठकले टुंगो लगाइसकेको छ ।

केही समयपछि पुनः पदाधिकारी बैठक बालुवाटारमा बस्ने भएको छ । पदाधिकारी बैठकमा जीवन परियार र फर्मुल्लाह मन्सुर भने सहभागी हुने छैनन् । उनीहरुको नाम पनि समानुपातिक सूचीमा रहेकाले निर्णय प्रभावित हुने भएकाले पदाधिकारी बैठकमा उनीहरु सहभागी हुन पाउने छैनन् ।