इण्डियन मोडर्न स्कूल बसको ठक्करबाट सशस्त्र प्रहरीको मृत्यु

२५ मंसिर, काठमाडौं । कीर्तिपुरमा इण्डियन मोडर्न स्कूल बसको ठक्करबाट सशस्त्र प्रहरी बलका एक जवानको मृत्यु भएको छ । कीर्तिपुर नगरपालिका–६ स्थित सशस्त्र प्रहरी गण अगाडिको मूल सडकमा बसले आइतबार बिहान ९ बजे चोभार गेटनजिकै ठक्कर दिँदा माेटरसाइकलमा सवार २९ वर्षीय सुवासचन्द्र रतेलाको ज्यान गएको हो ।

बल्खुबाट चोभारतर्फ गइरहेको इण्डियन मोडर्न स्कूलको ना१क १६१२ नम्बरको बसले रतेला सवार बागमती एएए २९०८ नम्बरको सरकारी मोटरसाइकललाई ठक्कर दिएको थियो । उनको बयोधा अस्पतालमा उपचारको क्रममा मृत्यु भएको प्रहरीले जनाएको छ ।

ठक्करपछि घाइते भएका रतलालाई उपचारको लागि बल्खुस्थित बयोधा अस्पताल लगिएको थियो । उनको उपचारको क्रममा मृत्यु भएको हो ।

बझाङको जयपृथ्वीबहादुर नगरपालिका कोटेली–५ निवासी रतेला सशस्त्र प्रहरी केन्द्रीय कार्यालय हलचोकमा कार्यरत थिए । बस चालक मनजित सिंहलाई महानगरीय प्रहरी वृत्त कीर्तिपुरले नियन्त्रणमा लिएको छ ।