राजस्व कार्यालय कर्मचारीको पोशाकमा असुलीधन्दा चलाउने ४ महिलासहित ८ जना पक्राउ

२५ मंसिर, काठमाडौं । आन्तरिक राजस्व कार्यालयका कर्मचारी हौं भन्दै नयाँ बसपार्क क्षेत्रका होटल र पसलबाट रकम असुल्ने ८ जनालाई प्रहरीले पक्राउ गरेको छ ।

आफूहरु आन्तरिक राजस्व कार्यालय लाजिम्पाटको कर्मचारी भएको भन्दै होटल, रेष्टुरेन्ट, पसल र फुटपाथबाट रकम असुल गरेको आरोपमा उनीहरुलाई पक्राउ गरिएको जिल्ला प्रहरी परिसर काठमाडौंले जनाएको छ ।

पक्राउ पर्नेमा पूर्वी नवलपरासीका पाँचथरकी सिर्जना भट्टराई, सिन्धुपाल्चोककी प्रमिसा तामाङ, अछामकी दूधकला विक, नुवाकोटकी अञ्जना तामाङ, मीनबहादुर बिक, अछामकी सागरजंग लुहार र कञ्चनपुरका राजीव विष्ट र डेविड धामी रहेका छन् ।

उनीहरुले आन्तरिक राजस्व कार्यालयको कर्मचारीले जस्तै पोशाक लगाउनुका साथै परिचय पत्र पनि बोकेको पाइएको प्रहरीले जनाएको छ । स्थानीय व्यवसायीले शंका लागेर प्रहरीलाई खबर गरेपछि शक्रबार साँझ प्रहरी वृत्त बालाजुबाट खटिएको टोलीले उनीहरुलाई पक्राउ गरेको हो ।

प्रहीले आन्तरिक राजस्व कार्यालयको जस्तै स्टाम्प, लेटरप्याड, रसिद र परिचयपत्र समेत बरामद भएको प्रहरीले जनाएको छ । उनीहरुविरुद्ध ४ जना ब्यवसायीले लिखित जाहेरी दिएका छन् ।

उनीहरुले ५ लाख रुपैयाँ भन्दा बढी रकम असुलेको पाइएको छ । उनीहरुविरुद्ध ठगी र कीर्तेसम्बन्धी कसुरमा अनुसन्धान भइरहेको जनाइएको छ ।