रेशम चौधरी छुट्ने हल्लापछि डिल्लीबजार कारागारमा पार्टीका नेता-कार्यकर्ता भेला

२६ मंसिर, काठमाडौं । हत्या कसुरमा आजीवन कारावासको सजाय भोगिरहेका नागरिक उन्मुक्ति पार्टीका संरक्षक समेत रहेका रेशमलाल चौधरी छुट्ने भन्दै नागरिक उन्मुक्ति पार्टीका नेता कार्यकर्ता डिल्लीबजार कारागार अगाडि भेला भएका छन् ।

सरकारले थरुहट आन्दोलन, विप्लव नेतृत्वको नेकपालगायत राजनीतिक पार्टीका नेता कार्यकर्तालाई छुटाउन अध्यादेश ल्याउने निर्णय गरेलगत्तै सोमबार बिहान डिल्लीबजार कारागारमा रहेका रेशम चौधरी छुट्ने हल्ला चलेको हो ।

आइतबार सरकारले अध्यादेश ल्याउने निर्णय गरेलगत्तै नागरिक उन्मुक्ति पार्टीकी अध्यक्ष रञ्जिता श्रेष्ठले आफ्नो पार्टी सरकारमा सामेल हुने र रेशम चौधरी कारागारबाट छुट्ने प्रतिक्रिया मिडियालाई दिएकी थिइन् ।

अहिले डिल्लीबजार कारागार अगाडि सडकमा रेशम चौधरीका कार्यकर्ता पार्टीका झन्डा र फूलमालासहित उपस्थित हुने क्रम चलिरहेको छ । डिल्लीबजार कारागार प्रशासनले भने यसबारे आफूलाई कुनै जानकारी नभएको जनाएको छ ।
चुनाव सकिएलगत्तै माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष माधवकुमार नेपाल, पूर्वप्रधानमन्त्री बाबुराम भट्टराईले कारागारमै गएर चौधरीलाई भेटेका थिए । उनीहरूले नयाँ बन्ने सरकारमा नागरिक उन्मुक्ति पार्टीलाई सहभागी हुन आग्रह गरेका थिए । जवाफमा चौधरीले थरुहट आन्दोलनमा सहभागीमाथि लगाइएको मुद्दा खारेज र आममाफी दिनुपर्ने प्रस्ताव गरेका थिए ।

टीकापुर हत्याकाण्डमा एक बालकसहित आठ सुरक्षाकर्मीले ज्यान गुमाएका थिए । सो घटना रेशम चौधरीकै निर्देशनमा भएको भन्दै अदालतले उनलाई आजीवन कारावासको सजाय सुनाएको थियो ।

चाैधरीले कारागारबाटै श्रीमती रञ्जिताकाे नेतृत्वमा नागरिक उन्मुक्ति पार्टी गठन गरी गत वैशाखमा स्थानीय चुनाव र यही मंसिर ४ मा प्रतिनिधिसभा तथा प्रदेशसभा निर्वाचनमा भाग लिन लगाएका थिए । पार्टीले प्रनितििधसभा मात्रै ३ सिट जितेकाे छ भने स्वतन्त्रबाट उठाएर २ सिट हात पारेकाे छ । प्रदेशसभा पनि सुदूरपश्चिम प्रदेशमा निर्णायक शक्ति बनेकाे छ ।