टिप्परको ठक्करपछि घाँटी थिचेर हत्या गरेको आरोप

२७ मंसिर, काठमाडौं । काठमाडौंको तारकेश्वर नगरपालिका–३ स्थित तीनपिप्लेमा एक युवकको मृत्यु टिपरको ठक्करबाट नभइ हत्या गरिएको बताएका छन् ।

यही मंसिर २५ गते राति ११ बजेतिर २१ वर्षीय सविन फुयाँलको टिप्परको ठक्करबाट मृत्यु भएको दाबी गरिए पनि परिवारले भने हत्या भएको बताएका छन् । फुयाँललाई बा ५ ख ६७७९ नम्बरको टिप्परले ठक्कर दिएकाे थियाे । टिपरलाई प्रहरीले नियन्त्रणमा लिएकाे छ ।

ठक्‍करबाट घाइते भएका फुयाँललाई चालक र अन्य मानिसहरु मिलेर बालुवा लाेड गर्न प्रयाेग गरिने सावेलले घाँटी थिचेर हत्या गरेको आराेप मृतकका दाजु जयरामले लगाएका छन् । घटनामा संलग्नताको आशंका प्रहरीले शिव बलामी र बिमल बलामीलाई पक्राउ गरिसकेको छ ।

दोषीलाई कर्तव्य ज्यान कसुरमा मुद्दा चलाउन माग गर्दै सोमबार पीडित पक्षले तीनपिप्ले स्थित प्रहरी कार्यालयमा घेराउ गरेका छन् ।

अभियुक्त शिवले आफूलाई टिप्पर धनी बिमलले १५ लाख नगद दिने लोभ देखाएर हत्या स्वीकार्न बाध्य बनाएको प्रहरीलाई बयान दिएका छन् । टिप्पर बिमलले चलाएको बेला ठक्कर दिएको खुलेको प्रहरीको दाबी छ ।