पुसमा निक्षेपको ब्याजदर नबढ्ने, तरलतामा सहजता आउने दाबी

२७ मंसिर, काठमाडौं । बैंकहरुले पुस महिनामा निक्षेपको ब्याजदर नबढाउने भएका छन् । यससँगै व्यक्तिगत मुद्दति निक्षेपको अधिकतम १२.१३३ प्रतिशत, बचतको ९.१३३ प्रतिशत र संस्थागत मुद्दति निक्षेपको १०.१३३ प्रतिशतको ब्याजदर यथावत रहने भएको हो ।

रेमिट्यान्स निक्षेपमा भने बचत र मुद्दति दुवैमा न्यूनतम १ प्रतिशत बिन्दुले बढी ब्याजदर दिनुपर्ने प्रावधान छ । अहिले बैंकिङ प्रणालीमा तरलता अभाव कम हुँदै गएको छ ।

बैंकले पुसमा आयकरको प्रथम किस्ता भुक्तानी गर्नुपर्छ । पुनर्कर्जा सुविधा नवीकरण नहुने अवस्था र पुसपछि स्थानीय तहको सञ्चित कोषको ५० प्रतिशत मात्रै निक्षेपमा गणना गर्न पाइने प्रावधानका कारण पुःन दबाव बढ्न सक्ने  देखिएपछि पुसमा निक्षेपको ब्याजदर नचलाउने निर्णय भएको नेपाल बैंकर्स संघले जनाएको छ ।