लाल आयोगको प्रतिवेदन सार्वजनिक गर्न विवेकशील साझाको माग

२७ मंसिर, काठमाडौं । विवेकशील साझा पार्टीले लाल आयोगको प्रतिवेदन सार्वजनिक सरकारसँग माग गरेको छ । टिकापुर घटनामा तयार पारेको लाल आयोग गुपचुप राखेर सरकारले घटनामा संलग्नहरुलाई रिहा गर्ने योजनामा अध्यादेश ल्याउन लागिएको भन्दै साझाले विरोध गरेको छ ।

फाैजदारी कानून संशाेधन गर्न सरकारले ल्याउन लागेकाे अध्यादेशको पार्टीका प्रवक्ताले आज प्रेस विज्ञप्ति जारी गरेर विरोध जनाएका छन् ।लाल आयोगको प्रतिवेदन सार्वजनिक गरी पीडितहरूको समस्या सम्बोधन गर्न र अध्यादेश फिर्ता लिएर लोकतन्त्रको साख बचाउन सरकारसँग माग गरेको छ ।

प्रतिवेदन सार्वजनिक नगरी सत्ता सौदावाजीका लागि अध्यादेश ल्याउनु असंवैधानिक भएको बताएको छ । काम चलाउ सरकारले सत्ता सौदावाजीको कुत्सित मनसाय राखेर दूरगामी असर पार्ने अध्यादेश ल्याउने धृष्टताप्रति गम्भीर आपत्ति रहेको मंगलबार जारी विज्ञप्तिमार्फत उल्लेख छ ।

प्रवक्ता प्रकाशचन्द्र परियारद्वारा जारी विज्ञप्तिमा नयाँ सरकार बन्ने प्रक्रियाको मुखैमा सरकारले अध्यादेश ल्याउन खोज्नु नयाँ जनमत र संसद्को समेत अवमूल्यन भएको ठहर गरेको उल्लेख छ ।