थारु र मुस्लिमलाई मधेशीको सूचीबाट हटाइयो

२७ मंसिर, काठमाडौं । थारु र मुस्लिम समूदायलाई मधेशी समुदायको सूचीबाट हटाइएको छ । मधेसी आयोगको मसिंर २० गतेको बैठकले नेपालमा मधेसी समुदायको थर सूचीकरण अध्ययन प्रतिवेदन–२०७८ बाट उपसमूह १ मा रहेको थारु जाति र २ मा रहेको मुस्लिम जातिलाई हटाउने निर्णय गरेको आयोगका अध्यक्ष डा. विजयकुमार दत्तले जानकारी दिएका छन् ।

समूदायबाट परेको निवेदनमाथि छलफलपछि हटाउने निर्णय भएको उनले बताए । निर्णय कार्यन्वयनको लागि आयोगकी उपसचिव सबिता डंगोलले प्रधानमन्त्री तथा मन्त्रिपरिषद्को कार्यालयलाई पत्र पठाएकी छन् ।

थारु र मुस्लिम समुदायका विभिन्न संघ(संगठनहरुले थारु र मुस्लिम समुदायको छुटै पहिचान र सभ्यता रहेको र मधेशी समुदायसँग नमिल्ने भन्दै मधेशी क्लस्टरमा आफूहरुलाई नराख्न आयोगमा निवेदन दिएका थिए ।

मधेशी आयोगमा थारु र मुस्लिम सहित १४९ जात (थर)लाई मधेशीको रुपमा सूचीकृत थिए ।