सरकारले ल्याएको अध्यादेश राष्ट्रपतिबाट प्रमाणिकरण हुनेमा विप्लव विश्वस्त

२७ मंसिर, काठमाडौं । विप्लव नेतृत्वको नेकपाले सरकारले प्रमाणिकरणका लागि राष्ट्रपति विद्यादेवी भण्डारीसमक्ष पेश गरेको फौजदारी आचारसंहिता संशोधनसहितको अध्यादेशको स्वागत गरेको छ ।

नेकपा महासचिव नेत्रविक्रम चन्द ‘विप्लव’ मंगलबार एक प्रेस विज्ञप्ति जारी गरेर सरकारले ल्याएको अध्यादेश राष्ट्रपति भण्डारीबाट प्रमाणिकरण हुनेमा विश्वस्त रहेको बताएका छन् । प्रमाणिकरण गरी सहमति कार्यान्वयनमा सहयोग गर्न आग्रह गरेका छन् ।

‘सहमति पालना र कार्यान्वयनमा हाम्रो पार्टी प्रतिवद्ध रहेको र सरकारले पनि समस्यालाई सकारात्मक रुपले निकास दिन गरिरहेको पहललाई मनन्‌ गर्दै संवैधानिक राष्ट्रप्रमुख सम्माननीय राष्ट्रपतिले पनि अध्यादेशलाई स्वीकृती प्रदान गर्नेमा पार्टी विश्वस्त छ’ विज्ञप्तिमा उल्लेख छ ।

विज्ञप्तिमासहमति लागू हुन नदिने गलत सोच र बुझाईलाई सफल हुन नदिन सबै पार्टी, नेता, कानुनविद र मानवअधिकारवादीहरुसँग गम्भीर बन्न आग्रह गरिएको छ ।