प्रहरीमा ३० वर्षे सेवा अवधि हट्ने, उमेर हद कायम रहने

२७ मंसिर, काठमाडौं । नेपाल प्रहरीमा ३० वर्षे सेवा अवधि हटने भएको छ । गृह मन्त्रालयले पठाएको सेवा अवधि हटाउने प्रस्तावमा अर्थ मन्त्रालयले सहमति दिएको छ ।

गृहले प्रहरी नियमावली–२०१२ लाई संशोधन गरेर सेवा अवधि हटाउन प्रस्ताव गरेको थियो । तर, सरकारले उमेर हद कायम रहने भएको छ । सेवा अवधि हट्ने व्यवस्था लागू भने एक वर्षपछि मात्र लागू हुने सर्तमा अर्थले सहमति दिएको हो ।

अर्थबाट सहमति आएको प्रस्ताव अनुसार जागिर अवधि ३० वर्ष पुरा भए पनि ५८ वर्ष पुरा नहुँदासम्म आईजीपी अवकाशमा जाँदैनन् । प्रहरी महानिरीक्षक (आईजी) अहिले ३ वटा अवस्था पुरा गरेपछि अवकाशमा जाने कानुनी व्यवस्था छ ।

अर्थ मन्त्रालयबाट सहमति दिएको प्रस्ताव गृह मन्त्रालयमा गएको छ । गृहले उक्त प्रस्ताव कानुन मन्त्रालय हुँदै मन्त्रिपरिषद्मा गर्नेछ ।

गृहमन्त्री बालकृष्ण खाण प्रहरीको ३० वर्षे सेवा अवधि हटाउने पक्षमा नरहे पनि प्रधानमन्त्री शेरबहादुर देउवाको ठाडो आदेशमा गृह सचिव विनोद प्रकाश सिंहले प्रस्ताव अघि बढाएका थिए ।