बालाजुमा ९० वर्षीया वृद्धा मृत फेला, हत्याको आशंका

२७ मंसिर, काठमाडौं । काठमाडौंको बालाजुमा एक ९० वर्षीया वृद्धाको मृत्यु हत्याबाट भएको आशंका गरिएको छ । तार्केश्वर नगरपालिका–६ बस्ने डिल्ली पतुवारको मंसिर २२ गते शव फेला परेको हो ।

उनी बालाजुस्थित एक टहरोमा बस्दै आएकी थिइन् । उनको शव सोही नगरपालिका वडा नम्बर–३ मा पर्ने जंगलमा फेला परेको प्रहरीले जनाएको छ । प्रहरीले उनको पोस्टमार्टम रिपोर्टमा उनको टाउकोमा हिर्काएकोजस्तो देखिएको प्रहरीको भनाइ छ ।

उनका श्रीमान‍्को मृत्यु भइसकेको छ । मृतकका चार छोरी र एक छोरा भए पनि उनी एक्लै आफ्नै भएको टहरोमा बस्दै आएकी थिइन् ।

सधैँ नजिकै रहेको छोरीको घरमा खाना खान जाने गरेकी वृद्धा २० गते भने खाना खान नगएको र सम्पर्कविहीन भएपछि बालाजु प्रहरीमा खोजीका लागि उजुरी दर्ता गरिएकोमा खोजीका क्रममा २२ गते मृत फेला गरेकी छन् ।

उनको नाममा करोड बढी पर्ने जमिन रहेकाले सोही कारणले हत्या गरिएको हुनसक्ने र घटनामा नजिककै आफन्तको संलग्नता हुनसक्ने प्रहरीको अनुमान छ ।