सविन फुयाललाई न्यायको माग गर्दै त्रिचन्द्रका विद्यार्थीद्वारा प्रदर्शन

२८ मंसिर, काठमाडौं । काठमाडौंको तारकेश्वर नगरपालिका–३ मा टिपरले ठक्कर दिएर घाइते भएका एक युवकलाई आक्रमण गरी हत्या गरेको भन्दै त्रिचन्द्र क्याम्पसका विद्यार्थीहरुले विरोध प्रदर्शन गरेका छन् ।

पीडित परिवारलाई न्याय दिन र दोषीलाई कारबाही गर्न माग गर्दै त्रिचन्द्र क्याम्पसका विद्यार्थीहरुले बुधबार बिहान र्‍ब्यानर र प्लेकार्डसहित प्रदर्शन गरेका हुन् ।

त्रिचन्द्र क्याम्पसका विद्यार्थी तारकेश्वर नगरपालिका ३, पाँचमाने निवासी २१ वर्षीय सविन फुयाँललाई मंसिर २५ गते राति ९ बजे महालक्ष्मी एण्ड बलामी सप्लायर्सको बा५ख ६७७९ नम्बरको टिपरले ठक्कर दिएको थियो ।

त्यसपछि टिपरका चालकलगायतले फुयाँलको घाँटीमा साबेलले आक्रमण गरेर हत्या गरेको पीडित परिवारको दाबी छ । ‘टिप्परले ठक्कर दिएपछि कर्तव्य गरेर मारेको भन्ने हाम्रो निष्कर्ष हो, दोषीलाई सर्वस्वसहित जन्मकैद हुनुपर्छ,’ मृतकका आफन्त जयराम घिमिरेले भने ।

घिमिरेका अनुसार दुर्घटनास्थलभन्दा करिब २० मिटर पर बालुवामा शव गाड्न लाग्दा स्थानीयले देखेपछि टिपरचालक लगायतका अभियुक्तहरु भागेका थिए । टिपरको स्टेरिङ, अगाडिको हृयाण्डल र चक्कामा रगतका टाटा देखिएको भन्दै दुर्घटनापछि हत्या गरेको प्रदर्शनकारीहरुको भनाइ छ ।

उक्त घटनापछि टिपर व्यवसायीले सिन्धुलीका शिव बलामीलाई नक्कली चालक खडा गरी बालाजु प्रहरीमा पठाइएको  पाइएकोसमेत घिमिरेले बताए । त्यसपछि प्रहरीले महालक्ष्मी एण्ड बलामी सप्लायर्सका संचालक र उनका भाइलाई पक्राउ गरिएको छ । ठक्कर दिने टिपर प्रहरीको नियन्त्रणमा  छ ।