प्रचण्डको योजनामा ओली र गुरुङबीच भेटवार्ता

२८ मंसिर, काठमाडौं । नेकपा (एमाले)का अध्यक्ष केपी शर्मा ओली र नेकपा (माओवादी केन्द्र)का महासचिव देव गुरुङबीच ओली निवास बालकोटमा भेटवार्ता भएको छ ।

माओवादी केन्द्रका अध्यक्ष पुष्पकमल दाहाल ‘प्रचण्ड’ले ओलीलाई भेटेरै बधाई दिन महासचिव गुरुङलाई पठाएको बताइएको छ ।

भेटमाओलीलाई प्रतिनिधिसभा सदस्यमा निर्वाचित भएकोमा बधाई शुभकामना दिएको महासचिव गुरुङले बताए । सो क्रममा राजनीतिक कुराकानी भएको बुझिएको छ । नयाँ सरकार गठनको प्रक्रिया सुरु हुन लागेको बेला भएके भेटघाटलाई अर्थपूर्ण रुपमा लिइएको छ ।

हालै सम्पन्न आमनिर्वाचनमा ओली झापा ५ बाट प्रतिनिधिसभा सदस्यमा निर्वाचित भएका छन् भने गुरूङ लमजुङबाट एमालेका उम्मेदवारसँग पराजित भएका छन् ।

हालै सम्पन्न आमनिर्वाचनबाट कांग्रेस पहिलो, एमाले दोस्रो र माओवादी केन्द्र तेस्रो स्थानमा आएका छन् । सरकारको नेतृत्वमा तीन वटै दलले दाबी सुरु गरेको छ ।