६८३ मेगावाटको सुनकोसी तेस्रो जलविद्युत आयोजना निर्माणको ढोका खुल्यो

२७ मंसिर, काठमाडौं । रामेछापको लुभुघाटमा बन्ने ६८३ मेगावाटको सुनकोसी तेस्रो निर्माणको बाटो खुलेको छ ।

संभाव्यता अध्ययनको काम सम्पन्नपश्चात तयार पारिएकाे वातावरणीय प्रभाव मूल्यांकन (ईआईए) प्रतिवेदन सरकारले स्वीकृत गरेकाे छ । वन तथा वातावरण मन्त्रालयको जिम्मेवारी समेत सम्हालेका प्रधानमन्त्री शेरबहादुर देउवाले प्रतिवेदन स्वीकृत गरेका हुन् ।

स्वीकृत भएको जानकारी मन्त्रालयको वातावरण तथा जैविक विविधता शाखाका प्रमुख एवं उपसचिव मधुदेवी घिमिरेले सूचनामार्फत जानकारी दिएकी छन् । प्रतिवेदन स्वीकृतिका लागि उर्जा मन्त्रालयले वातावरण मन्त्रालय पठाएकाे थियाे । योसँगै आयोजना निर्माणको लागि बाटो खुलेको हो । आयोजना जलाशयुक्त प्रणालीमा बन्दैछ ।

आयोजना अघि बढाउन विद्युत विभागले गृहकार्य अघि बढाएको छ । लगानीको स्रोत जुटाउन भने सरकारले बंगलादेश सरकारसँग कुराकानी अगाडि बढाएको छ । आयोजनाको फिजिविलिटी र वातावरण अध्ययनमा परामर्शदाता कम्पनी एसआईआरसआई र ईआरएमसी जेभीले काम गरेको थियो ।

शाखाले आयोजना निर्माणका लागि निर्माण पक्षसँग १८ बुँदे सर्त राखिएको छ । आयोजनाका लागि जग्गा प्राप्ति, बस्ती स्थानान्तरण तथा मुअब्जा वितरणको सन्दर्भमा छुट्टै योजना बनाई काम गर्नुपर्ने सर्त राखिएको छ ।

यस्तै आयोजना निर्माणका क्रममा उठेका प्रश्नहरुको सार्वजनिक सुनुवाई गर्न र दैवी प्रकोप व्यवस्थापन योजना बनाई तल्लो तटीय क्षेत्रमा लागू गर्नुपर्ने लगायत सर्त लागू हुने जारी सूचनामा उल्लेख छ ।