गायिका आस्था राउतलाई अमेरिकी अध्यागमनले नेपाल फिर्ता पठायो

२९ मंसिर, काठमाडौं । सांगीतिक कार्यक्रमका लागि अमेरिका उडेकी गायिका आस्था राउतलाई त्यहाँस्थित डालस अध्यागमनले नेपाल फिर्ता पठाइदिएको छ ।

पर्यटक भिसामा सांगीतिक कार्यक्रम गर्न नपाइने कारण देखाउँदै आफूलाई अमेरिका प्रवेशमा रोक लगाइएको आस्थाले बताइन् । डिसेम्बर १० मा आफू त्यहाँ पुग्दा अध्यागमन अधिकारीले रोकेको उनले बताइन् ।

यसअघि पनि २०१७, २०१८ र २०२१ मा भिजिट भिसामै कन्सर्ट गरेकोबारे जानकारी गराए पनि अधिकारीहरूले नमानेकाे उनले बताइन् । अधिकारीहरूका अनुसार नै काठमाडौं दूतावासमा गएर पुनः पी-३ भिसा लिएर जाने उनकाे उनकाे भनाइ छ ।

आफूले सन् २०१५ मै भिजिट भिसा लिएको उनले बताइन् । अंग्रेजी नयाँ वर्ष २०२३ को छेकोमा पेन्सिलभेनियाको लानकास्टरमा नेपाली समुदायले आयोजना गरेको सांगीतिक कार्यक्रम (कन्सर्ट)मा भाग लिन आस्था त्यसतर्फ जाँदै थिइन् । कन्सर्टमा सहभागी हुन नपाएपछि आस्थाले दुःख व्यक्त गरिन् ।