निर्वाचन आयोगले पुस ४ मा जलपान आयोजना गर्ने

२९ मंसिर, काठमाडौं । प्रतिनिधिसभा र प्रदेशसभा सदस्य निर्वाचन सफलतापूर्वक सम्पन्न भएको अवसरमा निर्वाचन आयोगले आगामी पुस ४ गते जलपान कार्यक्रमको आयोजना गर्ने भएको छ ।

आयोगको प्रांगणमा अपरान्ह साढे १ बजेका लागि जलपान कार्यक्रम आयोजना गरिएको प्रवक्ता शालिग्राम शर्मा पौडेलले जानकारी दिएका छन् ।

जलपान कार्यक्रममा राष्ट्रपति, उपराष्ट्रपति, प्रधानमन्त्रीसहित अति विशिष्ट पदाधिकारी, मन्त्री, पूर्वप्रधानमन्त्री, राजनीतिक दलका नेता, सुरक्षा अंगका प्रमुख, कूटनीतिक नियोगका प्रमुख तथा प्रतिनिधि लगायतलाई आमन्त्रण गरिएको उनले बताए ।

आयोगले गत वैशाखमा स्थानीय तह र यही मंसिरमा प्रतिनिधिसभा र प्रदेशसभा सदस्य निर्वाचन सम्पन्न गरेको थियो । प्रतिनिधिसभा र प्रदेशसभा सदस्य निर्वाचनमा निर्वाचितहरूकाे नामावलीसहित प्रतिवेदन आजै मात्र राष्ट्रपति विद्यादेवी भण्डारीसमक्ष पेस गरिएकाे छ ।