टेण्डरको निहुँमा एमालेका कार्यकर्ताद्वारा अमिनमाथि कुटपिट

२९ मंसिर, जनकपुर । नेकपा (एमाले)का कार्यकर्ताले गुठी संस्थान जनकपुरधामका अमिन प्रभातचन्द्र पोखरेलमाथि कार्यकक्षमै कुटपिट गरेका छन् ।

पोखरेलमाथि बिहीबार दिउँसो करिब साढे १२ बजेको समयमा एमालेका नगर कमिटी अध्यक्ष सुरेन्द्र भण्डारीले लछारपछार गर्दै कुटपिट गरेको पीडितले बताए । टेण्डर दर्ता नगर्न दबाब दिँदै एमाले नेता भण्डारीले आफूमाथि कुटपिट गरेको अमिन पोखरेलले बताए ।

धनुषाको क्षीरेश्वरनाथ नगरपालिका–३ बस्ने संजय कुमार मण्डलले टेण्डरका लागि बिहीबार दिउँसो १२ बजेभित्रै आफ्नो टेबलमा राखेको फाइललाई दर्ता नगर्न दबाब दिँदै कुटपिट गरेका हुन् ।

दर्ता नगर्न आफूले नमान्दा तानेर कार्यालय परिसरबाहिर पुर्याएर कुटपिट गरेको पोखरेलले बताए । उनको अनुहार र हातमा चोट लागेको छ ।