वायुसेवा निगममा ‘क्याबिन क्रु’ आन्दोलित, रियाद र बैङ्लोरका यात्रु राेकिए

२९ मंसिर, काठमाडौं । नेपाल वायुसेवा निगममा दुई जना एयर होस्टेसको करार नवीकरण नभएको विषयलाई लिएर क्याबिन क्रु आन्दोलनमा उत्रिएका छन् । आन्दोलनका कारण दिल्ली, रियाद, बैलोर उड्ने यात्रु अलपत्र परेका छन् ।

बिहीबार क्याबिन क्रुले निगम मुख्यालयमा आन्दोलन गर्दा धकेलाधकेलको समेत अवस्था आएको थियो । निगममा हरेक ५ वर्षमा क्याबिन क्रुको करार नवीकरण गर्ने व्यवस्था छ ।

यसक्रममा दुई जना एयर होस्टेसको करार नवीकरण गर्न व्यवस्थापनले नमानेपछि उनीहरु आन्दोलित भएका हुन् । उनीहरुको आन्दोलनका कारण बुधबार र बिहीबारका अन्तर्राष्ट्रिय उडानहरु प्रभावित बनेका छन् ।

बुधबार काठमाडौंबाट दोहा र दुबई उड्नु पर्ने जहाजहरु तीन घण्टा डिले गरी उडेका थिए । बिहीबार काठमाडौंबाट साउदीको रियाद र भारतको नयाँ दिल्ली उड्नु पर्ने जहाजहरु समेत क्रुको आन्दोलनका कारण राेकिएका छन् ।