अध्यादेश विरूद्धको रिट सर्वोच्चद्वारा दरपिठ

२९ मंसिर, काठमाडौंं । सर्वस्वसहित जन्मकैदको कैद सजाय पाएर कैद भोगिरहेका रेशम चौधरीलगायतलाई छुटाउन मिल्ने गरी सरकारले ल्याएको अध्यादेश खारेज गर्न माग गर्दै सर्वोच्चमा दिइएको रिट निवेदन दरपिठ भएको छ।

अधिवक्ता कपिलेदव ढकालले दिएको रिट बिहीबार दरपिठ भएको सर्वोच्च अदालत प्रशासन दर्ता गर्न अस्वीकार गर्दै दरपिठ गरिदिएको हो ।

सरकारले पठाएको अध्यादेश राष्ट्रपतिबाट प्रमाणीकरण नभएकाले अहिले नै अध्यादेश रोकिपाउँ भनेर रिट दिन नमिल्ने जनाउँदै रिट दर्ता नगरेको सर्वोच्च प्रशासनले जनाएको छ।

सरकारले नागरिक उन्मुक्ति पार्टीका संस्थापक रेशम चौधरीसहित टीकापुर हत्याकाण्डमा जेलमा रहेकाहरूलाई रिहा गर्न मिल्ने गरी अध्यादेश ल्याएको भन्दै विरोध भइरहेको छ ।

प्रमाणिकरणका लागि अध्यादेश राष्ट्रपति विद्यादेवी भण्डारीकहाँ सिफारिस गरेको चौथो दिनसम्म प्रमाणिकरण भएको छैन । बुधबार मात्र राष्ट्रपतिको कार्यालयले एक सूचना जारी गरेर अहिल्यै प्रमाणिकरण हुने संभावना नरहेको जनाएको थियो ।