बिहीबार मध्याह्न १२ बजे स्वतन्त्र सांसदसहित सर्वदलीय बैठक

६ पुष, काठमाडौं । संसद सचिवालयले प्रतिनिधिसभाका सांसदहरुलाई शपथ ग्रहण गराउनु अघि स्वतन्त्र सांसदसहित संसदमा प्रतिनिधित्व गर्ने दलका नेताहरुको सर्वदलीय बैठक बोलाएको छ । प्रतिनिधिसभाका सांसदहरूको शपथग्रहणभन्दा पहिले नै संसद्का ज्येष्ठ सदस्य पशुपतिशमशेर राणाको अध्यक्षतामा सर्वदलीय बैठक बोलाइएको हो ।

बिहीबार १ बजे शपथका लागि प्रतिनिधिसभाको बैठक बोलाइएको छ । त्यसअघि १२ बजे संसदमा प्रतिनिधित्व गर्ने सबै राजनीतिक दलका नेताहरूलाई सर्वदलीय बैठकमा बोलाइएको संसद सचिवालयले जनाएको छ । संसद् सचिवालयका अनुसार १२ राजनीतिक दलबाट १–१ जना र ५ स्वतन्त्र सांसदहरूलाई सर्वदलीय बैठकमा बोलाइएको हो ।

उक्त बैठकमा शपथसम्बन्धी कार्यक्रमको ब्रिफिङ गर्ने सचिवालयको भनाइ छ । शपथ कसरी लिने, सांसदहरूलाई दिइने सुविधा लगायत विषयमा महासचिव र कार्यव्यवस्था महाशाखाका अधिकारीले ब्रिफिङ गर्ने कार्यक्रम रहेको छ । उक्त बैठकमा सांसदहरूलाई सकेसम्म राष्ट्रिय पोसाकमा आउन या आफ्नो मौलिक संस्कृति झल्किने पोसाक लगाएर उपस्थित हुन आग्रह गरिने बताइएको छ ।