प्रदेश १ का सिंचाइमन्त्री राईद्वारा राजीनामा

७ पुष, मोरङ । मंसिर ४ मा सम्पन्न प्रतिनिधिसभा निर्वाचनमा खोटाङ जिल्लाबाट प्रतिनिधिसभा निर्वाचनमा विजयी भएका प्रदेश नम्बर १ का खानेपानी, सिंचाइ तथा ऊर्जामन्त्री रामकुमार राईले राजीनामा दिएका छन् । उनले संघीय सांसदको शपथग्रहणको एक दिन अगाडि नै राजीनामा दिएपनि सार्वजनिक गरेका थिएनन् ।

उनले बुधबार नै मुख्यमन्त्री राजेन्द्रकुमार राई समक्ष राजीनामा दिएको मन्त्री राईका स्वकीय सचिव जीवन राईले जानकारी दिए ।

२०७८ कार्तिक १६ राजेन्द्रकुमार राई मुख्यमन्त्री नियुक्त भएपछि खोटाङका राईलाई २०७८ माघ २३ गते खानेपानी, सिंचाइ तथा उर्जा मन्त्रीमा नियुक्त गरेका थिए ।

राईले निर्वाचनमा खोटाङबाट एमाले नेता विशाल भट्टराईलाई पराजित गरेका हुन् । भट्टराईले २८ हजार ६८२ मत ल्याउँदा राईले ३१ हजार ३५१ मत ल्याएर विजयी बनेका हुन् । उनले संघीय सांसद पदको शपथ बिहीबार लिएका छन् ।