सन्दीप प्रकरण: नाबालिका भनिएकी किशोरीको उमेर १८ वर्ष पुगेको दाबी

७ पुष, काठमाडौं । क्रिकेटर सन्दीप लामिछानेविरुद्ध बलात्कारको आरोप लगाउने किशोरीको उमेर १८ वर्षभन्दा माथि रहेको पत्र प्राप्त भएको लामिछानेका वकिलले दाबी गरेका छन् ।

वकिलका अनुसार आरोप लगाउने किशोरीको उमेर १८ वर्षभन्दा माथि रहेको पत्र जिल्ला अदालत काठमाडौंमा १५ दिन पहिल्यै पठाइएको छ । किशोरीको जन्म मिति नै दुइवटा भेटिएको विषयले पनि यसअघिदेखि नै चर्चा पाइरहेको छ । अदालतमा पेश भएको कागजातमा किशोरीको जन्म मिति २०६१ जेठ १८ गते रहेको छ ।

यसअघि काठमाडौं जिल्ला अदालतले किशोरीको स्थायी ठेगाना रहेको नुवाकोटको स्थानीय तहलाई किशोरीको जन्मदर्ता लगायतका कागजातको सक्कल प्रति र ढड्डा नै पठाउन आदेश दिएपछि उक्त गाउँपालिकाले नाबालिकाको उमेर खुल्ने जन्मदर्ताको ढड्डा लगायतका कागज काठमाडौँ जिल्ला अदालतमा पठाएको हो ।

यो मितिअनुसार बलात्कार भएको भनिएको समयमा किशोरीको उमेर १८ वर्षभन्दा माथि रहेको देखिएको वकिलको जिकिर छ । १८ वर्ष पुगेपछि आपसी सहमतिमा यौनसम्बन्ध स्थापित हुनसक्ने दाबी ती वकिलको छ । तर १८ वर्ष नपुगी सहमतिमै यौनसम्बन्ध भए पनि त्यसलाई बलात्कार मानिने कानुनी व्यवस्था छ ।

सन्दीपविरुद्ध बलात्कारको जाहेरी दिने किशोरीको उमेर १८ वर्ष पुगिसकेको प्रमाणित भएमा उक्त मुद्दामा परिवर्तन हुन सक्ने कानूनविदहरूको तर्क छ ।