राय र राईले प्रतिनिधिसभा सदस्यका शपथ लिँदै

८ पुष, काठमाडौं । नेपाल समाजवादी पार्टीका अध्यक्ष महिन्द्रराय यादव र नेकपा (माओवादी केन्द्र)का रामकुमार राईले आज प्रतिनिधिसभा सदस्यको शपथ लिँदैछन् ।

बिहीबार शपथग्रहण गर्न छुटेका उनीहरूले शुक्रबार बिहान साढे ११ बजे संसद भवन नयाँ बानेश्वरमा ज्येष्ठ सदस्य पशुपति शमशेर राणासमक्ष शपथ लिँदैछन् ।

यादव माओवादी केन्द्रको चुनाव चिह्न लिएर सर्लाही २ बाट प्रतिनिधिसभा सदस्यमा निर्वाचित भएका हुन् । राई खोटाङबाट निर्वाचित माओवादी केन्द्रका सांसद हुन् ।

संसद सचिवालयका अनुसार उपत्यका बाहिर रहेका यादव र राई दुवै मौसम प्रतिकूलताका कारण हवाइ उडान ढिलो हुँदा बिहीबारको शपथग्रहण सहभागी हुन सकेका थिएनन् ।

प्रतिनिधिसभाका २७५ मध्ये २७१ जनाले बिहीबार नै शपथ खाइसकेका छन् । बाँकी ४ मध्ये राई, राय, नेपाली कांग्रेसका माया राई र नेकपा (एकीकृत समाजवादी)का प्रेम आलेको शपथ बाँकी रहेको थियो । माया राई सुत्केरीका अस्पतालमा र आले आमाको निधनमा किरिया बसेका कारण अनुपस्थित थिए । माया र प्रेमको शपथ पछि नै गरिने भएको संघीय संसद सचिवालयले जनाएको छ ।