सिरियल किलर चार्ल्स शोभराज मिडिया छल्ने दाउमा

८ पुष, काठमाडौं । सिरियल किलर चार्ल्स शोभराजले मिडियालाई आफ्नो तस्बिर खिच्न नदिन केन्द्रीय कारागार प्रशासनलाई आग्रह गरेका छन् । फोटो पनि खिच्न नदिन र मिडियासँग कुराकानीको अवस्था आउन नदिने व्यवस्था मिलाइदिन आग्रह गरेका छन् ।

उनलाई आफ्नो देश फिर्ताका लागि कारागार प्रशासनले आज अध्यागमन विभागमा उपस्थित गराउँदैछ । अध्यागमनले पासपोर्ट लगायतका कागजपत्र हेरेर उनकै देश फ्रान्स फर्काउने तयारी गरेको छ ।

नेपालमा १९ वर्षदेखि जेल सजाय भोगिरहेका शोभराजलाई गत बुधबार सर्वोच्चले रिहा गर्न आदेश दिँदै आदेशको १५ दिनभित्र स्वदेश फर्काउन भनेको थियो । उनले फ्रान्सबाट आएका आफन्तहरु हायत होटेलमा रहेकाले आफूलाई केही दिन त्यहीँ बस्ने व्यवस्था मिलाइदिन पनि आग्रह गरेको बताइएको छ । नेपालभित्रै मुटुकाे उपचार गराउने व्यवस्था गराउन पनि उनले प्रशासनसँग माग गरेका छन् ।

सन् १९६३ देखि १९७६ को अवधिमा थाइल्याण्ड, पाकिस्तान, भारत, मलेसिया, फ्रान्स, अफगानिस्तान, टर्की र ग्रिसमा श्रृंखलाबद्ध हत्या गरेर फरार व्यक्ति थिए । २१ डिसेम्बर १९७५ मा नेपालको भक्तपुरमा आरमण्ड लरेन्ट क्यारियर र त्यसको दुई दिनपछि कोनिजो ब्रान्ची नामका युवतीको हत्या गरेको घटनामा अदालतबाट दोषी ठहर भएको थियो ।

घटनामा उनीविरुद्ध अन्तर्राष्ट्रिय अपराध प्रहरी संगठन (इन्टरपोल) ले ग्रिन कर्नर नोटिस जारी गरेर खोजीपश्चात २०६१ मा नेपाल आएका बेला पक्राउ परेका थिए ।