यादव र राईले लिए संघीय सांसदको शपथ, अझै २ जना बाँकी

८ पुष, काठमाडौं । प्रतिनिधिसभा सदस्य (सांसद)मा शुक्रबार दुई जना सांसदहरूले पद तथा गोपनियताको शपथ लिएका छन् । नेकपा (माओवादी केन्द्र)का महिन्द्रराय यादव र सांसद राजकुमार राईले शपथ लिएका हुन् ।

उनीहरुलाई संघीय संसद् सचिवालयमा प्रतिनिधिसभाका जेष्ठ सदस्य पशुपतिशमशेर जबराले शपथ गराएका हुन् ।
बिहीबार प्रतिनिधिसभामा निर्वाचित सांसदहरूलाई जबारले नयाँ बानेश्वरस्थित संसद् भवनमा सामूहिक शपथ गराएका थिए ।

अब नेपाली कांग्रेसका माया राई र नेकपा (एकीकृत समाजवादी)का प्रेम आले मात्र शपथ लिन बाँकी छन् । आले आमाको शोकमा र राई सुत्केरीका कारण शपथ रोकिएको हो । उनीहरुकै अनुकूलतामा शपथ गराइने संघीय संसद सचिवालयले जनाएको छ ।

संसदका २७५ मध्ये २७१ जनाकाे शपथग्रहण बिहीबार नै भइसकेकाे छ ।