बागमती प्रदेशमा सर्वदलीय बैठक, प्रदेश सांसदको शपथग्रहणबारे टुंगो लगाइँदै

८ पुष, काठमाडौं । बागमती प्रदेशमा सर्वदलीय बैठक सुरु भएको छ । प्रदेशसभा सचिवालय हेटौंडमा सुरु भएको हो । बैठकमा सांसदहरुको शपथ ग्रहणको विषयमा छलफल हुँदैछ ।

बैठकले प्रदेशसभाको दोस्रो कार्यकालका लागि निर्वाचित भएका सांसदहरुको जेष्ठ सदस्यको अन्तिम निर्णय, शपथ ग्रहणको मिति टुंग्याउनेछ ।

पुस ११ गते जेष्ठ सदस्यको शपथ र १२ गते अन्य सांसदहरुको शपथ ग्रहणको कार्यक्रम राख्ने तयारी भएको प्रदेससभा सचिवालयका सचिव कृष्णहरि खड्काले बताए ।

प्रदेशसभाको पहिलो बैठकको अध्यक्षताका लागि सचिवालयले जेष्ठ सदस्यको रूपमा नेकपा (माओवादी केन्द्र)का नुवाकोट निर्वाचन क्षेत्र २ (क)बाट प्रदेशसभामा निर्वाचित सांसद रामप्रसाद ढुंगानालाई पहिलो बैठकको अध्यक्षतासहित अन्य सांसदहरुको शपथ ग्रहण गराउने तय भइसकेकोले सोही विषयलाई निर्णयबाट टुंग्याउन बैठक बोलाइएको हो ।

संविधानको धारा १८३ अनुसार प्रदेश सभाको सभामुख र उपसभामुखको निर्वाचन नभएको अवस्थामा निर्वाचन आयोगले निर्वाचनको अन्तिम नतिजा सार्वजनिक गरेको २० दिनभित्र बैठक आह्वान गरिसक्नुपर्ने र उक्त बैठकको अध्यक्षता ज्येष्ठ सदस्यले गर्ने व्यवस्था छ ।